Kam chibynta wow pynsñiawthooh paidbah ya ka thong pyndooh noh yei kjut Tuberculosis (TB) hapoh ka National Tuberculosis Elimination Program waka Scheme thymme wa tip kam ka Pradhan Mantri TB Mukt Bharat Abhiyan kawa man ka Scheme wow yarap ya kiwa chitom TB da kiwa chong chnong, ki bru samen hadooh ki Company.
Hajrong ini, ka District Tuberculosis Officer, Jaiñtia Hills deiwa ya krehlang waka Star Cement, Lumshnong hapoh ka CSR kani ka karkhana, da saam mar baam ki hapoh ka Community Engagement Support Scheme neibynta kiwa kjut TB haka yalang wa da pynman ha Pamra Paithlu PHC , East Jaiñtia Hills District ynne ka sngi.
Ha kani ka sngi da emlang waka District Tuberculosis Officer kawa man leh kam ka DM&HO ka West Jaiñtia Hills District, ka Dr. E B V Laloo, u Medical Officer ka Pamra Paithlu PHC, u Dr. G. Chyrmang deilang wa u Manager ka Star Cement Limited, Lumshnong, u Kingshok B Borah wa kiwa kreh ka NTEP wa Pamra Paithlu PHC.
Ka Dr. E B V Laloo hawa e yei klam da khana ko ya ki dak ki chin lada yoh Tuberculosis, ki laad sumaar kamjooh ki rukom yada ha-yung ha-sem yow lait u poor ini i kjut.
Da ong ko leh i wym biang baam, i dih kiad, i dih sikret, i baam duma ye i wow yah chei mih ki khñiang kiwa sdang yei kjut TB, kamtæ da pynchlur ko wow dih tista yei dawai kamwa da phah ki Doctor.
Da khana ko leh wa heipor wa dih yei dawai TB, ka sorkar yarap poisa ko lyngba ka Nishay Poshan Yojana Scheme deiwa e Rs. 500 chi bnai hadooh wa pyndep yei dih dawai.
Hadien kani ka yalang da saam ya ki mar baam wa kynthup ya u khoo, phñiang baam, ki pylleiñ wa kiwi kiwi de cha ki 27 ngut kiwa kjut TB kiwa da ya emlang.
Discussion about this post