Ki 66 ngut ki bru wa man kyrpang, ha ka 26 tarik uni u bnai da yoh ki da ki tiar ki tar ki wow yarap yei im wa man-ka-sngi yong ki, kamjooh leh da yoh ki ya ka Niramaya Health Insurance Card ha ka yalang wa da pynman ha Community Hall ka Lad Mukhla, wa da pynman da ka yung krehkaam u District Social Welfare Officer, ki bor District ka West Jaiñtia Hills wa ka Composite Regional Centre for Skill Development Rehabilitation Empowerment of Persons with Disabilities (Divyangjan) (CRCSRE, Shillong), Meghalaya.
Ki tiar wa da saam ha kani ka sngi kynthup ki chuki wa em chaka (Wheelchair, Motorized Tricycle, CP Chair, Wheelchair Auxiliary Crutch), ki tiar Hearing Aid wa yarap yei bor sñiaw ki, ki dieñ chdooh wa kiwi kiwi.
Ya kini ki tiar da wan wow e kti da u Symbood Montri Rangbah, u Sniawbhalang Dhar uwa da man leh kam u kongsan chirup u Wailadmiki Shylla, MLA Jowai uwa man leh u Chairman ka MUDA, hei emlang u Deputy Commissioner ka West Jaiñtia Hills District, u Abhinav Kumanr Singh, u Dr. Ram Shakal Sahani, Director ka CRCSRE, Shilong, u Y. Najiar, District Social Welfare Officer wa kiwi.
Hawa e yei klam u Symbood Montri da kyntu u ya ki bru wa em duna wow sñiawbha ki u bood ryntih yeiwa phah ka sorkar khnang yow lait ki nei dooh myntoi iwa da mang kyrpang ka sorkar neibynta yong ki.
Da ban joor haroh u hajrong i emkaam u pynpsiah pyrtuid hapoh u Aadhaar ya idæ khnang yow yoh ya ki Scheme waphær waphær, neibhah wa ka sorkar leh chimkhia bha ko u e i kyrchaan ya ki bru wa em duna.
Kyntu haroh u wow sumaar bha ya kini ki tiar wa da saam cha ki ha kani ka sngi.
U Wailadmiki Shylla hawa pynsñiaw ya kattu katni tylli ki Scheme wa ka sorkar da e yarap ko, da e yaroh u khamtam hajrong ka Health Insurance kawa tip kam ka Niramaya Health Insurance Scheme neibhah wa em ko ya ka bynta wa khroo u yarap hei kjut chitom ki bru wa em i duna.
Da pynrap haroh u hajrong i kordor i puræ puthi khamtam ya kiwa em duna, neibhah suk bha ki u yoh kreh sorkar neidaw wa da em ka bhah kyrpang yong ki hi. Kyntu haroh u ya kiwa yoh myntoi ha kani ka sngi wow chimkhia ki u thooh bniah kamwa da yoh ki ya kini ki tiar wa ye u yarap e bor pynman laitlooid ki hajrong wa em i duna wa em ha ki.




Discussion about this post