Ka Hill’s Farmer Union, Thadlaskein Block Unit, West Jaintia Hills District da e khublei kyrpang ko ya ka chnat Forest yong ka West Jaiñtia Hills District lyngba ka Ranger Officer kawa da e da ki tynre dieñ dawai (Medicinal Plants) cha ki warep.
Neiliang u President ka HFU Thadlaskein Block u Mutshwa Thabah, ha ka sngi wa saam ya ki tre dieñ cha ki warep na ki chnong waphær waphær yong ka Thadlaskein Block, da kyntu u ya ki warep wa toh u sumaar bha ya kini ki dieñ kiwa kyrpang wa kiwa emkaam bha. Wei rap niar u yoh ya kam kini ki dieñ kiwa pynmyntoi ha kiwa boon ki bynta, najrong wa yarap ki wow pynsboh ya ka khyndaw wei pynbha ki ya ka rymaw, man ki leh ki dawai wow e yei chait i khiah ha kiwa boon jait kjut wa chitom ki bru.
U Secretary yong ka HFU Thadlaskein Block u Chanbor Rymbai, da kyntu u ya ki warep wa toh u pynmyllien wow thung dieñ wei wow sumaar bha ya ki dieñ, khamtam ki thaw rep yong i neidaw wa boonsien em ki ha ha chariñ loom wei ini daw yarap wow pynneh pynsah ya i sboh yong i khyndaw. Da kyntu u leh wa kiwa yoh bhah wow kheiñkor bha ya kini ki dieñ, neibhah wa rap niar wow yoh ya kam kini ki symbe dieñ.
Ki tynre dieñ kiwa da yoh wow saam cha ki warep toh u Bahera, Arjuna, Laphiang, Dalchini, Sla Tyrpad, Sohmylleng wa u dieñ Neem.
Ki warep da em ki da phaw ngut na ki 13 tylli ki chnong kiwa haap hapoh ka Thadlaskein Block kiwa da yoh bhah ya kini ki tre dieñ.
