Ka yachem yong ki warep kiwa em hapoh ka Farmer Collectivisation for Up-scaling Production and Marketing System (FOCUS) da pynman ynne ka sngi ha District Library Auditorium, Mynthong, Jowai.
U kongsan ha kani ka sngi toh u P.K. Boro, Additional Deputy Commissioner wei uwa man leh kam u Project Director DRDA, West Jaiñtia Hills. Da emlang leh u Dr. D.I. Kjam, District Veterinary & Animal Husbandry Officer, u C. Najiar, District Horticulture Officer, ka S.E. Kynjing, u B. Niang, ki sahep na ka Horticulture wa Agriculture Department, Jowai wa u Chanky Lyngdoh, Managing Director Chankylliang Development Society kawa kam ka Partner NGO.
Ya ka yalang da wan wow chimbynta da ki warep kiwa em hapoh ka Producers’ Group na ki le tylli ki C&RD Block-Amlarem, Thadlaskein wa Laskein.
Hawa klam kam u kongsan, u PK Boro da pynchlur u ya ki warep wow pynemkaam ya ini i yarap wa da e ka sorkar heitæ i rukom wow yoh myntoi deiwa pynproh yeiwa tip ki chaphang i rep i riang wei wow rep khlem da artatien.
Da kyrpaad u leh ya ki NGO kiwa da ya krehlang wa kynthup ya ka SURE waka Chankylliang Development Society wow yahluti wei wow e sikai ya ki warep yow ye ki u pynboon pynbha ya iwa ye ki u pynmih.
U Starwell Paduna, Assistant Manager, Amlarem Block hei pynyoo u kammon krehkaam ka FOCUS (Farmer Collectivisation for Up-scaling Production and Marketing System) da khana u leh wa hapoh ka FOCUS u e yarap T. 5000 cha waroh kiwa da em pyrtuid hapoh yong ka kawa ym toh ka ram tangwa kawa da e yow pynku yei yoh i kot ki warep. Da pyntip u leh wa hapoh ka Amlarem C&RD Block da em 48 tylli ki Producers’ Group, ha Laskein C&RD 52 tylli ki Producers’ Group wa hapoh ka Thadlaskein 68 tylli.
U Dr. D.I. Kjam, District Veterinary Animal & Husbandry Officer, u Chanky Lyngdoh, Managing Director, Chankyliang, Development Society wa kawa mihkhmat ya ka SURE leh da klam ki ha kani ka sngi deiwa pynchlur ya ki warep yow pynemkaam ki ya kani ka kabu yow pynbha pynmiat ya ki mar rep yong ki.
Da em leh ki 2 ngut ki dkhot ki Producers’ Groups kiwa da yoh wow pynsñiaw yeiwa sñiaw yong ki.
Ha kani ka yalang da saam leh ya ki Cheque cha ki kattu katni ngut ki dkhot ki Producers’ Group.
U Sywell Lyngdoh, District Project Manager, District Basin Development Unit, West Jaiñtia Hills District da pynlai u ya ka yalang heiwa da yoh ya ki ktien pdiang sñiawbha na ka Muhor Ksiar Syngkon, Assistant Manager, District Project Manager wa ki kyntien e khublei na ka Erniki K. Shylla, Assistant Manager, Laskein Block.
