Jowai: Ka Balang Katholik kawa da yoohkjat ha chnong Pohratiang (Umjalisiaw) Namdong Parish, West Jaiñtia Hills ha u snem 1973 wa ki para wa ngait nadooh katai ka snem da pynman yungmane ki ha ka yungtrep kawa chna da ki siej wei da pynthymme na kawi ka por cha kawei ka por da ki siej. Da i yarap kiwa lehbha na ki Para Khristan, na ka Parish Namdong wa na ka Bishop’s House, da yoh ya ka yungmane kawa paka kawa heh wa kawa miat kawa da wai haka 24 tarik uni u bnai da u MDC ka thaaiñ u Dawan Lyngdoh, ya kawa da pynkyntang ha i nam “Ka yungmane u Khrist u syiem” wei da kyrkhu ya ka da Umkhooid Umkyntang da u Most. Rev. Victor Lyngdoh DD, Bishop ka jylla-ñiam Jowai.
Ha kani ka sngi da emlang ki Lyngdohsohblei Phadar Cresence Laloo, Phadar Becare Dkhar, Phadar Ferdinand Dkhar (Procurator ka jylla ñiam Jowai), Phadar Mahi Maidas, Phadar Poly Shylla, kiwa yahkhmat na ka Balang Church of North India (CNI), na ka Balang U Blei (Church of God), na ka Balang Presbyterian wa kiwa mihkhmat na ka Balang Seventh Day wa da ki hajar ngut ki paaid Khristan kiwa wan najan wa na jngai.
U Bishop Victor Lyngdoh, hawa e yei klam ha kani ka sngi, da pynsñiaw u yei sñiawngooh ya u Blai wa ya kiwa lehbha waroh kiwa da yarap wow chna ya kani ka yungmane, ka yung duwai wa ka yung chong yong u Blai, kawa heh wa kawa miat.
Ha i jooh i por da pynsñiaw u yei kmen kawa khroo wei e khublei kyrpang u yei emlang kiwi ki balang wow sakhilang yei wai ya kani ka yungmane. Neitæ da ong u wa i emlang kiwa yahkhmat ki balang waphær waphær, man ko kam ka dak ya maya, i ya burom hapyrdi ki jaitbru Khasi-Pnar, wei da kyrmen skem u wa ini i mynsien ya maya wa ya burom iwi ya iwi khlem em i tæ i mynsien yaphær ñiam u neh ko waka ya tylli hapyrdi ka jaitbru Khasi-Pnar ha ki sngi wa ha ki por wow wan.
Discussion about this post