Ka North Liberty Higher Secondary School ha ka 17 tarik uni u bnai da pynman ko ka yachemlang wa kyrpang wow leh burom ya ki khynnah skur yong ka kiwa da wan chakhmat ha ka Exam SSLC wa HSSLC 2023.
Ha ka yalang wa kyrpang yong i leh burom wa da pynlai da ka Deigratia Syngkrem, Asst. Teacher, u Sniawbhalang Dhar, Symbood Montri Rangbah ka Meghalaya wa pait leh ya ka chnat Transport waka Commerce & Industries da wan u wow sakhilang kam u kongsan hei emlang ka A.P. Syiem, District School Education Officer, West Jaiñtia Hills kam ka symbood kongsan, u Pa Dolloi ka Elaka Jowai, u Waheh Puramon Kynjin, u Khroobok Passah, District Sports Officer, West Jaiñtia Hills, kiwa seiñ ka skur, u B. Uriah waka H. Uriah, ki bei ki pa yong ki khynnah skur wa kiwi kiwa cha khut sñiawbha.
Kam wow kdar luti ya ki bynta wa chakhmat yong ini i leh burom, da yoh i duwai Blai na ka Evameai Pohdweng, Asst. Teacher, i klam e mynsien ya ki khynnah skur na u V.M. Rai, Senior Lecturer NLHSS, na u Kampher Pala uwi na ki khynnah skur warim ka NLHSSS uwa dang pteiñ yei puræ MBBS ha Guwahati wa kamjooh ki kyntien na u Daebor Susngi wa man uwi na ki khynroo wa da chah pynkup burom ha kani ka sngi.
U Sniawbhalang Dhar hawa e kyntien kam u kongsan da yaroh u ya ki bor pait bor pynlai ka skur wei da kyrsu kyntu u leh ya ki khynnah wa da pynkup burom ha kani ka sngi wow man kiwa em itæ i mynsien dap chynrang dap kynthai wow yaleh hei wow yaknieh u poi cha ka thong, ymtoh u man kiwa hun u kut du ha chiteiñ.
Chooh chooh da pynkyrpang wei pynsah kynmoo ya kani ka sngi dei wai paidbah u kongsan ya ka Vocational Course in Agriculture.
U Richard B. Uriah, Principal NLHSS hawa khana chaphang kani ka Vocational Course da ong wa ka thong yong kani ka Course toh wow pynpsiah hei thij i pyrkhat wei man i sñiaw ki khynnah kammon u tip ki u kheiñkor wei wow im chirup wa ka bei rym-aw, neitæ da ong u leh kam ka i sdang yong kani ka Course ha uni u snem, u e sikai chwa ya ki khynnah skur kammon u tip ki u thung wei u sumaar ya ki syntu, ki jhur, ki soh wa kiwi kiwi wa man chibynta ka luti wow pynpliah yei tip i chemphang yong ki heiyatoh wa ki kaam rep kaam riang.
Ki khon khynroo khyllood ka NLHSS kiwa da chah pynkup burom ha kani ka sngi em ki 93 ngut kiwa da pyndep ya ka SSLC Exam heiwa 3 ngut toh kiwa da psiah ha ka Top 20 Merit list neitæ 61 ngut kiwa da pyndep ya ka 12 Arts HSSLC Examination wa 53 ngut won toh kiwa da pyndep ya ka 12 Science HSSLC Examination 2023.
Chooh chooh ha kani ka sngi da em leh i pynkup burom wa kyrpang ya ki khynnah wa da rah naam rah burom ya ka skur ha ki kam yaleh Sports kiwa da pynman ha ka District wa ka jylla wa kamjooh leh ya kitu ki khynnah wa em sap heiliang i dro dur (Creative Mind).
Ya kani ka sngi wa khroo, ka NLHSS da pynphooh pynchongchit leh da ki rwai wei chaad yong ki khynnah skur neitæ khaddooh won da pynkut deiwa yoh ki kyntien khublei na u Risingstar Kharngi, Vice-Principal, NLHSS wa ki kyntien duwai pynkut na u Robert Rees.
