Shillong: Uwa yahkhmat ka Congress uwa man leh u MLA ka Mawlai Constituency, u Process T Sawkmie da ong u wa ki MLA ka Congress mam ki kiwa yatylli wow kyrchaan bait ya u kyrtong ka party, u Kennedy Khyriem ha ka Election cha Rajya Sabha ka wow man mynstep hanlada ka Congress duna paaid ko heiwa em ko du 19 ngut ki MLA ha ka yung dorbar wa 60 ngut.
Da ong u wa ka Congress katni yooluti ko ya i kaam wa phylla wei ymye u batai næ tip chwa neibhah i thap Vote wow leh da ki Secret Ballot wei chong ha ki MLA yeiyi u jied ki.
Heiyatoh wa i lai paan kyrchaan ka Congress na kiwi ki MLA, u Sawkmie da ong u wa man i iwa eh wow batai neibhah neiliang ki MLA ym khana ki yei thmu yong ki.
Hawa kylli, uni u heh ka Congress da ong u wa ymye wow tip lada ka phang yong ka Citizenship Amendment Act (CAA) næ ka Inner Line Permit (ILP) daw ktah ko namo ym ktah ko ha ini i jied MP cha Rajya Sabha, deiwa pynrap wa neiliang ki MLA em ki yong ki hi i bor sñiawthooh.
Heiyatoh wa i kylla ka saiñ pyrthai ha Manipur lada ye u ktah lang ko ha Meghalaya, u Sawkmie da ong u wa ha ka saiñpyrthai ye u jia iwon iwon wei i kwah hi ka Party toh wow em hei bor khnang wow ye u chakri bha ya ki paidbah deiwa pynrap leh wa lada em i tyrwa næ ki laad haap chim ya kini ki laad khnang wow yoh u em hei bor.
