Deiwa pait yei khmat ha ka thong, kiwa sait khnam ka Meghalaya ha kani ka 2nd North East Olympic Games 2022 da kreh chitom ki wow pynkhreh yow wanrah naam ya ka jylla.
Kiwa yasiat khnam toh kiwa dang chah sikai ha ka SAI Training Centre wa em ha NEHU Campus, wei da pynkhreh ki 10 kynta chi sngi heiwa ka yakob daw man ko leh ha kani ka thaw nadooh ka 10 tarik hadooh ka 16 tarik uni u bnai.
I yasiat khnam da yabhah ha ki le kyrdan wa kynthup ya ka Compound, Recurve wa Indian Round kiwa da pynemkaam da ki jar jiar ki jait ryntieh.
Ka Coach kiwa yalehka ka jylla toh ka Bansaralin Dhar, kawa da dep wow mihkhmat ya ka India ha ka World Archery Championships waka Asian Outdoor Championships chwa wow man ko kam ka Coach.
Da antaad ko wa ka Manipur, Assam wa Nagaland daw man ki kiwa rap chkeh tangwa kattæ leh da em ko yei kyrmen wow poi cha ka thong.
Kawi na kiwa da em i kyrmen toh ka Damandashisha Pasi, kawa daw boonkaam ha kini sngi heiwa daw chimbynta ko ha ka Junior National Archery Championship ha Goa wei daw liwan ko cha Shillong ha kani ka sngi Bibar.
“Sñiawkmen O wow lai cha Goa,” da ong ko chwa wow mih wei da e khublei ko leh ya ka Archery Association ka Meghalaya wa da e ki ya kani ka kabu wow yoh ko u lai. “Yooluti O wow leh bha heitai wei manda liwan wow lehbha ha ka North East Olympics kamjooh.”
Ka Damandashisha toh kawa 19 snem i rta kawa na West Jaiñtia Hills wei lada lehbha ko ye ko wow yoh yei thaw hapoh ka Khelo India Scheme hadooh wow man kam kawi na kiwa yalehke ka India.
Ka Damandashisha toh kawa da yoh takma ha ka 4th Meghalaya Games ha uni u snem.
Ka sorkar Meghalaya katni da pynbiang ko leh ya ki tiar ki tar wa man katkam ka juk wa katni heiwa ka Coach da ong ko wa ka ryntieh kawa biang wa bha yarap bha ko wow yoh takma.
Da ong ko leh wa ki ryntieh toh kiwa syad dor bha wei deiwa yarap ka sorkar deilang waka Sports Authority of India katni ki khynah wa dooh wa duk leh ye ki wow chimbynta.
