Yooluti ka Darrang wow sdang pdiang bru biang ha u Naichiphaw katwa dang pynjanai ko ya ki thaw uiñke hapoh ka chnong

Jowai: Ka chnong Darrang kawa haap hapoh ka Amlarem Sub Division, West Jaiñtia Hills District, kawa dang dep chna thymme ya kani ka chnong wow man kam kawi na ki thaw uiñke suwari wei da pynkhreh ya ka wow riñ ya ki paidbah na kylleiñ ka jylla wa ka ri.

Yow man ko kam kawi na ki “Tourist Spot”, kani ka chnong da pawnaam bha ko hei miat yirngam ka soodong sookun yong ka heiwa em ka um kawa khooid wa kai cha ka wah Mynngot wei ha kani ka chnong leh em ka yingkieñ jri kawa boon kiwa wan paitke ya ka.

Hapoh kani ka chnong da seiñ leh ya ka Darrang Tourism Promotion and Development Society (DTPDS) kawa krehlang wa ki bor ka chnong kiwa da minot bha wow chna ya ki wa emkaam nadooh ki paikhana paidbah, ki luti lai kjat, ki thaw paitke (Viewpoint) wa kamtæ ter ter.

Da em leh ka wi ka Resort kawa dang thymme wa da seiñ da uwi na kiwa chong chnong hapoh kani ka chnong kawa ye ki paidbah u sah miet kawa da biang lut nadong chadong.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hapoh kani ka chnong em leh ki Homestay kiwa da mih boon tylli katni wei ya kiwa sah cha lait da booh leh ya ka “Camping Site” ha Mawron Beach kawa miat bha ka thaw.

Waroh chisnem neiliang ki bor sorkar nadooh ki bor District, ka SDO Amlarem, ka tnat yong ka Block Sub Division, ka tnat yong ka PHE, ka tnat District Tourism wa ka BASIN waroh da chimkhia ki wow pynbha pynmait yow man kani ka chnong kawa ye u pdiang ya kiwa wan uiñke suwari kiwa da e sikai ya kiwa kiñ lieñ kiwa na ka chnong heiwa kammon wow yarap ya ki bru wa mynsoo wa kiwa ngam um.

Da em leh ki kattu katni ngut ki Tourist Guide kiwa da chah hikai heiwa kammon u pdiang ya kiwa uiñke suwari.

Ha kani ka chnong leh em ka thaw pynyeiñ kari kawa heh kawa ye hadooh ki Bus leh u pynyeiñ.

Katni ka chnong dang sangeh ko wow pdiang ya ki bru wa wan uiñke neidaw wa dang pynkhreh ka chnong u pynjanai ya ki thaw wa em hapoh ka chnong, wei u pdiang bru biang chwa i tlang kam ha u Naichiphaw (October) yong uni u snem.

Kani toh katkam wa pyntip u Reachingson Kongwang, Chairman DTPDS

Also Read: Hadien ka Shnongpdeng, kattu sa ka Darrang