Hadien wa u Retd. Justice T Vaiphei uwa khlieh ya ka takit hajrong i chah siat yap uwa yahkhmat warim ka HNLC da dep u wow e kti ya ka bui (Report) takit cha ka sorkar ha ka 20 tarik uni u bnai, neiliang kiwa ha yung u Cherish Starfield Thangkhiew da pynsñiaw ki wa kwah ki wa ka sorkar wow pyntip paidbah ki ya kani ka takit wei wow e kti leh ha kiwa ha yung.
Neiliang ka sorkar ym pu em da klam ko iyi iyi hajrong itai i chem yong ka takit, tangwa neiliang u Montri Rangbah ka jylla, u Conrad K Sangma da ong u wa ya ka bui daw puræ bniah chwa da ka chnat Political yong ka sorkar.
Neiliang u Granary Starfield Thangkhiew uwa man u diah u Cherish, da ong wa kam kiwa ha yung daw yang ki ya ka rai yong ka sorkar hajrong katai ka bui wei da pynsñiaw wa yooluti wow yoh ya ka bichaar wa hok.
Da ong wa neiliang kiwa ha yung daw lai ki wow booh dei thoh ha ka sorkar wow kyntu neibynta wow yoh ya ka Report wei wow pynsmat yei bichaar.
Hajrong kani ka takit, neiliang kiwa boon ki kynhun da booh ki yei dawa wa ka sorkar u pynbna paidbah ko ya ka Report wa dadep wow takit.
U Granary da booh u yei kyrpaad ya ka sorkar wow pyndep smat noh ya ini i kaam, khnang wow lait nei kynrum kynram, wei heijooh i por da kyrpaad leh ya ki paidbah wa ki kynhun waphær waphær wow yaichah sa chipor hadien wa da dep yang la kamwa 9 bnai.
