Ka seiñ All Jaiñtia Mid-Day Meal Workers Union ha ka 13 tarik uni u bnai da pynman ko ya ka yachemlang namo ka Annual General Meeting kawa san ha chnong Rngad, East Jaiñtia Hills District, yow ya phyllu ya pyrkhat neibynta i bha i miat ka seiñ.
Ha kani ka yachemlang, u Dr. Phervision Nongtdu, Principal Jaintia Eastern College, Khliehriat da wan sakhi u kam u kongsan hei emlang u Khroo Lamsalanki Pariat, Adviser ka AJMDMWU Central Body, u Ripos K Lyngdoh, Secretary ka chnong Rangad wa kiwi.
Ha ka yalang wa pynlai da ka Phiioris Syngkon, President AJMDMWU Laskeiñ Unit, da yoh i klam pdiang na u Jerry Anderson Suting, President AJMDMWU Central Body.
Neitæ najrong i klam u kongsan kamjooh kiwa chah khut sñiawbha ha kani sngi, da yoh leh i klam na ka Merry Shangpung, President ka All Jaintia Muster Roll Workers & Labour Union, i klam na ka Armelin Mawlieh, Asst. Secretary Union of Cook Cum Helper PM Poshan Meghalaya, na u Paul Sangma, Secretary ka All Garo Hills Mid-Day Meals Association wa kiwi.
Lyngba kani ka yachemlang ka seiñ da rai ko wow nang kreh bha yei kaam hanla khian i su leh, deiwa yooluti wa ka sorkar u pynku ko ya ka nong (Honorarium) yong ki ha u snem wow wan.
Ha kani ka sngi ka seiñ All Jaiñtia Mid-Day Meal Workers Union da yoh ki leh i pynsñiawthooh hajrong ka kjut HIVs/AIDs, iwa da e da u Ajoy Lanong, Project Director Meghalaya Aids Control Society, uwa da batai pynche kammon yoh ki bru ya uni u jait khñiang kjut, neitæ ki laad wow yada kamjooh wow e sumaar.
Da pynchongchit ya kani ka sngi da i rwai i chaad na ki Cook cum Helper PM Poshan ka chnong Tuber, Rymbai wa Rngad, katwa yei kyntien khublei da yoh naka Pdiang Chyrmang, President AJMDMWU East Jaiñtia Unit.
Discussion about this post