Ka Meghalaya da yooluti ko wow jop rap boon ki takma ha kani ka 2nd North East Olympic Games 2022, kawa daw sdang ha ka 10 tarik uni u bnai.
Da em i kyrmen wow jop ha ka yalehke Karate kawa ka Meghalaya da jooh rah naam ko nachwa hapoh ka ri kamjooh cha baar ri.
Hapoh i pait u Sensei Donboklang Lyngdoh da pyntip u wa da pynkhreh bha kattu la ar bnai da ki khynnah na ki skur wa ki College wei kiwa da em 17 snem chaneiñ i rta kiwa em waroh 28 ngut kiwa daw chimbynta ha ka Kata wa Kumite.
Kawi na kini toh ka Ester Mary Lyngdoh, kawa da yaleh Karate nadooh u 2000, heipor wa dang em ko 12 snem wei da ong ko wa da pynkhreh bha ki wei da yooluti wa daw yoh boon ki takma ksiar wa ki takma rupa.
Da yoh mynsien leh kiwa yalehke hapoh kani ka sorkar kawa da pynku da boon chah ka khusnaam cha kiwa yoh takma kawa nachwa wa jooh e T. 10,000 katwa katni da ki lak tangka iwa ka Ester da ong ko da pynchlur bha ya ka kawa da dep yoh takma ksiar wa takma rupa ya ka Meghalaya ha ka Kanninjuku National Shoto Cup Karate Championship ha u 2018.
Ha ka Table Tennis, ka Tanushshree Dasgupta da yooluti ko wow yada yei naam yong ka kam kawa jop ha ka 1st Nort East Olympics Games ha Manipur ha u snem 2018.
Ka Tanushree ynnin da liwan ko cha Shillong hadien wa yalehke ya ka College ko ha Chandigarh kam wow pynkhreh u chimbynta ha kani ka North East Olympics Games.
Neiliang ki chynrang ka Meghalaya, u Suranjit Dey da pynkhreh u ha Kolkata neibynta ini. Kiwi de kiwa yalehke kiwa da emlang ha Kolkata yow pynkhreh toh kiwa na Shillong, na Pariong, na Jowai wa na Nongstoin heiwa da pynlut ki 6 kynta chi sngi yow pynkhreh.
Neiliang u Coach, u Banshan Diengdoh da ong u wa emlaad wow jop boon ki takma deiwa ong wa kini kiwa yalehke ka Meghalaya toh kiwa dang khynroo wei man ki ka mynried ka yalehke Table Tennis ka Meghalaya deiwa pynrap wa ka Tanushree toh kawa da ih bha katni wei daw yaleh ko wow yada yei naam Champion ko.
