U Montri ka chnat Sports & Youth Affairs ka sorkar jylla, u Shakliar Warjri hawa wai ya ka lympung yalehbol, Meghalaya State League 2023 kawa da sdang ynne ka sngi ha Kiang Nangbah Stadium Jowai, da yooluti u wa ha ka sien wa le wa wan yooh kjat biang ha kani ka madan, ki paidbah wa dang yieñ paitke na rood madan daw yoh ki wow chong noh hapoh ka Gallery, neibhah katni ka sorkar da pynkhreh ko chait chait ya ka DPR khnang wow yoh smat noh ya ka mang tangka neibynta wow chna pynbha chooh chooh yeiwa emkaam wa dang duna ha kani ka madan.
Da ong u leh wa ka T. 25 klur wa da kular neibynta i bha i miat kani ka madan ym mut du neibynta ka Gallery tangwa yow pynyoh ya ka Athletic Track kamjooh.
Neitæ sñiawkmen u leh wow yoo wa ki kaam yalehbol ha ka jylla nang ku i neipor cheipor wei lyngba kani ka Meghalaya State League leh da yooluti u wa daw nang ye chooh chooh wow kyntu yei kaam yalehke hapoh ka ri.
Najrong u Montri ka chnat Sports da emlang leh ha kani ka sngi wa u MLA ka Jowai Connstituency, u Wailadmiki Shylla, u MDC ka Mawsynram, u Alvin Khyriem Sawkmie, u DSO ka West Jaiñtia Hills District u Khroobok Passah, ki dkhot ka MSL, ki dkhot ka WJDSA wa kiwi kiwi.
Kam wow pynkynmoo wa u Montri hei sien wa nyngkong da wan u ha Kiang Nangbah Stadium hawa pynhaap pyrda yei lehkmen dap 50 snem ka WJDSA wei ynne ka sien wa ar hawa wai ya ka MSL.
