Ka Meghalaya Physical Education and Sports Association (MPESA), da yachem ki haka 20 tarik uni u bnai ha Conference Hallka MSOA wow yaklam hajrong i eh wa chem kitu kiwa da pyndep yei puræ puthi ha kani ka kaam heiwa boon toh kiwa ym pu yoh kreh hadooh katni.
Ha kani ka jooh ka sngi ka MPESA da pynman ko leh yei pynkup burom ko ya u John F Kharshiing, Working President, MSOA uwa da smat wow pdiang wow yarap ya ka seiñ kam u Adviser wa ya ka Dr. Iadarika Wann, Vice President, MPESA.
Neiliang u John F Kharshiing da yaroh u yei yatylli ki dkhot ka MPESA deiwa klam leh yei wanrah yaka National Games 2022 hapoh jylla Meghalaya ka wym kut du ha ki Stadium wei daw wanrah ko yei kylla ha waroh ki liang heiwa daw man ko ka laad yaka Association wow sai yei sap yong ki yow ye ki khynroo khyllood wow poi chadooh ka Olympics lada pynlai ryntih ya ki kaam.
Da ong u leh wa waroh ki skur CBSE em ki ya ki Physical Instructor, kamtæ lada ka jylla thmu ko wow sai ya ki sap, hap i wow pynkrehkaam ya ki Policy kiwa biang heiwa emkaam wow thung ya ki Physical Instructor wa ki Coach ha man ki skur, College wa University hapoh ka jylla. Wei da yooluti u wa wa katni ha ka jylla daw pynmih ko ya kani ka hukum hapoh ka Education Policy wa ka Sports Policy.
