Neidaw wa chem chitom ki khynnah wa yaleh Cricket wow pynhun yeiwa emkaam hei puræ puthi kamjooh ki kyndon wa ki tarik yalehke wa da booh da ka BCCI neibynta ki yalehke Domestic, kamtæ neiliang ka Meghalaya Cricket Association (MCA) da kyntu ko ya u Montri Rangbah, u Conrad K Sangma wow pyrkhat neibynta kiwa yalehke Cricket kiwa dang puræ puthi.
Neiliang ka MCA hei yahkhmat u Honorary Secretary, u Rayonald Kharkamni da yachem ki wa u Conrad ha Nongpoh ynnin ka sngi deiwa emlang u Adviser u Montri Rangbah uwa man leh u Meghalaya Football Association President, u Hamletson Dohling chirup wa u Montri ka chnat Sports and Youth Affairs, u Wailadmiki Shylla.
Neiliang u Conrad da ong u wa daw chimkhia u ya ini i kaam wei wow pyrkhat leh yeiwa da tyrwa ka MCA kammon u leh.
Ka MCA ha ka chithi wa da e kti cha u Conrad wa cha u Wailadmiki da ong wa ki khynnah wa lai skur kiwa yaleh Cricket em ki por hap ki wow lai chimbynta ha ki Training Camp wa boon sngi wa ha ki Tournament wa da pynman cha baar ka jylla kiwa em i por ya tyngkhooh tarik wa ki School Exam hadooh ki Board Exam. Kamtæ da chem chitom ki wow pynbiang yei yalehke Sport kamjooh ka puræ puthi.
Kamtæ ka MCA da kyntu ko ya ka sorkar wow pynkhreh kyrpang da ki Special Exam neibynta kiwa yaleh Cricket, næ wow pait deiwa yei rukom kheiñ ya ka puræ puthi ki khamtam kitu kiwa mihkhmat ya ka jylla ki wym lait wow chong yaleh Exam.
Da ong wa deiwa leh kamni daw pynchlur ko ya kiwa yaleh Cricket kamjooh leh ym thut ka puræ puthi ki.
Discussion about this post