Amlarem : Ka Ministry of New and Renewable Energy u e poisa ko cha ka ophis ka SDO Amlarem Sub-Division kawa T. 4,92,75,200 (Soo klur khyndephaw ar lak ynñiaw phaw saan hajar ar spah) yow booh ya 5 tylli ki 50 kWp Solar Power Plant wa 1000 tylli ki Solar LED Street Light hapoh ka Sub-division.
Ya kani ka poisa da yoh lyngba ka Central Financial Assistance (CFA) wei daw pynkrehkaam ya ka da ka Meghalaya Non-Conventional Renewable Energy Development Agency (MNREDA) deilang waka ophis ka SDO.
Hei yatoh wa ini da pynman leh ya ka yalang paidbah ha kani ka 20 tarik u Naichiphaw heiwa da khut lang ya ki Waheh Chnong, ki khynnah khynroo, ki seiñ wa pait ya ki kaam uiñsawari wa kiwi kiwi yow pynbna cha ki ya kani poisa. Hei yatoh wa i yoh myntoi na kini ki Solar Street Light, da wan pynche ya kiwa boon wa emlang da u ma Jopthiaw Pariat, Project Officer MNREDA.
Oo da ong u wa yow ye u pyndap yei emkaam ya ka bor diñ ha yung ha sem, em kiwa thang da ka petrol, diesel, mooyong wa kiwi ki mar pohkyndaw kiwa ye u lut heiwon heiwon i por. Yow lait i lut kini ki mar poh khyndaw, ki scientist da thooh laad ki kammon u pyn emkaam noh i da kitæ kiwa khut i kam ka Renewable Energy namo ka bor diñ ka wym lut de wei ye phi u yoh heiwon i won i por katkam i emkaam i yong phi.
Kani ka Renewable Energy toh ka wym pynjakhlia ya ka Bei Rymaw neitae i daw pyn duna ko ya ka jakhlia (pollution) wa ya i chit ka sla pyrthai namo ka Global warming kamwa ong ki hei ktien pharæng.
Ki solar street light toh kiwa krehkaam da i bor ka sngi ki wow pynche ya ki luti syngkieñ cha ki thaw nongkyndong ki wym pu poi ki sainar light næ kitu ki chnong kiwa dooh light man i por khamtam hei miet i langoh.
Kini ki street light toh ki kiwa duna bha i baam bor diñ ki, kiwa neh slem, wei wa duna bha i lut hei wow pyntoh pynbiang ya ki.
Yow pysñiaw wa ki tre chnong mantre ki ya ki ki Solar Light, katkam ki kyndon ka MNRE waka MNREDA da booh dor ya kini ki Solar light T. 24,900 u wi tangwa neiliang ki chnong namo ki seiñ hap su du T. 6,570 don hi.
Kawi pa kawi ka chnong wa chim ya kini ki solar light leh haap ki u thung ya u wi u bru wow daw yoh yei sikai heiwa kammon syndong namo chna ya kini ki Solar Light lada sih ki.
Daw chna leh ya ka Village Solar Committee ka wow krehkaam lang wa ka ophis ka SDO yow jied ya ki thaw wow pynyieñ ya kini ki Solar Lamps kam ha ki skur, ki yaw, ki thaw uiñsawari, ki thaw piadbah wa kiwi kiwi.
Da phah ya ki Waheh Chnong wow pyntip won ki cha ka ophis ka SDO yei thaw kamjooh leh lada kwah namo ym kwah ki wa chnong chnong ya kini ki Solar Light.
Discussion about this post