Jowai: Ka pynsñiawthooh paidbah hajrong i kjut Ñianglyngkut kawa tip kam ka Sparsh Awareness Campaign da pynman ya ka ynnin ka sngi ha Jowai Civil Hospital, Ialong.
Ya ka yalang da pynlai da u Dr. K.C. Ajar, District Medical & Health Officer heiwa ka R.S. Manner, MCS, Additional Deputy Commissioner da puræ ko ya ka khubor na u DC ka WJH kawa ong wa hapoh ka District u pynwiar jait noh ya ini i kjut kamjooh leh u pynche yei boon i sñiawthooh bakla ya ki bru wa yoh ya ini i kjut.
Neiliang u Dr. R. Lanong, Leprosy Consultant, National Leprosy Eradication Programme (NLEP) North Eastern State da batai u chaphang ka Sparsh (Gentle Touch) Leprosy Awareness Campaign 2019 katwa neiliang u Dr. F. Paswett, Dermatologist ka JCH da khana u chaphang ki dak ki chin ini i kjut yow tip u yoh sumaar smat ya ini i kjut wei ym toh u teiñ ki paidbah ya ini i kjut neibhah man i iwa ye u sumaar.
Neiliang u waheh chnong ka Ialong u B. Shylla da e khublei u ya kani ka chnat sorkar wa da pynman ko ya kam kani ka yalang yow pynchlur ya ki paidbah u wan ki cha khmat yow yoh sumaar smat ki.
Ha kani ka sngi da yoh leh ya ka yalehke wa tbian na ki Bharat Scout and Guides kiwa da pynyoo yei yarap u Mahatma Gandhi ya kiwa yoh kjut Ñianglyngkut.
Da yoh yei klam na uwi u bru wa da yoh yei sumaar uwa da chait na i kjut Ñianglyngkut uwa da pynchlur ya kiwa chitom yow wan ki cha khmat yow yoh yei sumaar yow man ki kiwa chait wa khiah.
Discussion about this post