Shillong: Ka sorkar jylla da em ko ka thong wow pynku ya i rep tit khamtam u tit wa tip kam u ‘Shitake’ deiwa ya krehlang wa ka Company na ri Japan ka Yats Corporation Company Ltd.
Kiwa mihkhmat kani ka Company na Japan da wanpoi ki ha nongbah Shillong wow pynman ya ka phyllu yumut wa bniah wa ka chnat ka rep ka riang wei hadien wa u montri sorkar jylla uwa pait ya kani ka chnat u Banteidor Lyngdoh kiwa da chim ya ka rai wow soi soskular namo ka Memorandom of Understanding (MoU) smat katwa ye.
Hawa yaklam wa kiwa thoh khubor hadien ka yalang, u Banteidor Lyngdoh da ong u wa kani ka luti man ko ka kabu ya ki warep ka jylla Meghalaya.
“U tit ‘Shitake’ man u uwa ye dor bha u dai lada wyrchaw wa kiwi ki tit wei uwa pynemkaam bha ha ki Restaurant kiwa syad dor ha kylleiñ ka pyrthai,” da pyntip u montri.
U Banteidor da ong wa lada ini i thmu ka sorkar u lai bait i, ka jylla Meghalaya daw ye ko wow pynmih 1000 metric ton u tit ‘Shitake’ ha ki san snem wow wan, wei da pynrap u leh wa ka jylla ym hap ko wow khuslai wow pynlai yaaw ya uni u tit neidaw wa ka Company u thied hi ko ya u tit.
Da pyntip u leh wa hajrong kani ka thmu wow soi sorkular MoU ha kine ki tayaw wow wan, kattu katni ngut ki sahep wa ki warep daw phah cha Japan yow sakhi wei wow yoh sikai ki le bnai.
Hadooh katni ka jylla daw pynmih ya u tit doh (Oyster) wa ki tit badam (Button) kiwa da em boon bha, wei yow rep ya u tit ‘Shitake’ yahap bha ko ha East Khasi Hills, West wa South West Khasi Hills tangwa ym pu em pyrchang ha Ri Bhoi wa Garo Hills.
Neiliang u Representative Director ka Yats Corporate Co Ltd, u Yasuhide Ito, da ong u wa ka Company em ko i stat wa i buit wow pynku ya i rep ya u tit ‘Shitake’ wei waroh i buit i stat daw wanrah cha ka jylla Meghalaya.
Discussion about this post