Ha ka Joint Meeting wa da khut kyrpang ka WJSU ya ki Sports Club waphær waphær hapoh ka thaaiñ War Jaiñtia ha ka 28-06-25 ha Ladjaplem, Amlarem Civil Sub-Division neibynta u yachem yaphyllu yow yaklam sani hajrong i pyrchah yei pynemkaam bakla ya ka poisa paidbah yow chna ya ka Synthetic Football Turf ha madanbol Ladjaplem, Amlarem Civil Sub-Division kawa dang lai chakhmat i kreh katni, da wan chimbynta palat 30 tylli ki Sports Clubs ka thaaiñ kiwa da yoh yei tipmit.
Neiliang u Chairman ka Expert Committee wa da thung da ka Sports and Youth Sub-Committee, u Alban K Gashnga uwa man leh kam u Chief Adviser ka seiñ chirup ki ar ngut ki Civil Engineer wa ar ngut ki Synthetic Turf Installation Expert, u General Secretary ka seiñ, u Everest Langstang, u Vice President, ka seiñ u Heartcasing Dkhar da pynsñiaw ki i diaw deiwa ong wa i rukom chna Synthetic Football Turf toh deiwa kheiñ poh chawa palat pood ya ki paaid ka thaaiñ neibhah wa da chna tput kam i phylloh ri mrad.
U Everest Langstang da pynyoo paidbah u yei jubab RTI wa da yoh pdiang ki na ka Nodal Agency kawa pait pynlai wei chna ya kani ka madan ka State Sports Council Meghalaya, Shillong, kawa da khynjoh cha ka Rs. 7.93 klur katkam wa chem na ka RTI.
U Heartcasing Dkhar da batai bniah bha u heiyatoh ka RTI deiwa wyrchaw wa i dor yaaw katni (Actual Market Rates) katkam i chem ki neiwa thooh bniah hadien i yachem wa ka Expert Committee.
Kini hawah toh i yaphær hapyrdi i pyneh dor wa i dor ha ki yaaw ki haat (Overestimation & Actual Market Rates):
Katkam ka RTI, ka Contingency Charges man ko Rs 23,09,367 tangwa kani da man ko deiwa khlem da kdaw bniah kammon u pynlut ka wei da emkaam wow pynche.
I lut yow chna ya ka Sub-Base man ko Rs. 1,22,76,000 iwa kynthup wow booh ya ka 6 Inch Gravel Sub Base deiwa pynemkaam da ki 50mm, 20mm, 6mm wa 2mm Aggregates Layers. Neitæ wow loor deiwa pynemkaam da ka 8 Ton Road Roller, i booh ya ki 4 Inch Perforated Heavy Duty PVC deiwa song da ki jaar yow man kam ki dooid (Drainage) wei u chna ya ka Retaining Wall wa jrong wa 10cm wei kmai 15cm. Ini da kheiñ dor wa Rs. 80 per square feet x 79115 sq ft= Rs. 6329200. Kani da man ko ar chah yei dor wa toh u leh yeini.
I pynchna ya ka Drainage dapoi ko Rs 34,21,000 kawa man kam chibynta ka Sub-Base Package tangwa yeini ym em batai che hapoh ka RTI.
Ha ka RTI da ong i siang ya u Synthetic Football Turf chongdor Rs. 4,82,92,000.
Tangwa katkam wa chem ka seiñ wa lyngba ki Supplier wa da tipmit da ka FIFA, deiwa pynemkaam da u jait Turf wa pynmih da ka CC Aerox (High End), i dor man i Rs. 240.1 chi sqft wei neibynta i thaw wa heh 79115 sqft dapoi Rs. 1,89,94,034.
Sa uwi won u jait Turf wa tip kam u CC Pride Up (Standard) i dor man i Rs. 234.5 chi sqft wei neibynta i thaw wa heh 79115 sqft dapoi Rs. 1,85,48,750.
Tangwa neibynta kani ka madan da ong wa daw hap pynlut Rs. 4,33,55,020 iwa man Rs. 548 chi sq ft iwa man da jan dap Rs. 3 klur wa da pynheh yei dor wa dai ha ka yaaw ka haat.
Ka Brushing Machine won chongdor ko Rs. 3,00,000 tangwa ha ka RTI ym em khana da kiyi ka jiat u pynemkaam wei kawa na kawon ka Company.
Heiyatoh won wa i kreh Earth Work wow tih wow pynmadan ya kani ka madanbol wa heh 70m x 105m= 7350 sq m x 0.3= 2204 cubic metre i dor man i Rs. 300 chi cubic metre wei i lut dapoi i 2205 x 300= Rs. 6.7 lak.
Ka bai bordiñ Rs. 2 lak, i bai um Rs. 4 lak, i bai kreh ki bru Rs 17.5 lak wei ka bai Transportation man ko Rs. 12 lak iwa dapoi waroh Rs. 35.5 lak.
Hei lai li pait yei kreh kani ka madan da kiwa yahkhmat ki Sports Club waka WJSU da chem ki boon i duna. Kani ka Synthetic Football Turf man ko ka wym yahaap wei ka wym toh wym tne kamwa da mang deiwa siang da ki Carpet tohdor. Ka madan man ko ka wym biang i rukom pynmadan wei da add palat pood iwa pynyoo che wa kani ka madan ym chan ko tang chi bnai leh.
I ker sainar ya ka madan yoo lakam i thaw ri mrad heidor wa da mang Rs. 57 lak tam, wei i wym jooh jia ha ki Standard Football Field, deiwa pynrap boi kani ka madan wow yalehke ki chrieh. I chna kynroh naneiñ madan leh yoo lakam wa kiwa yalehbol daw hap deiñ helmet yow lait takha i khlieh.
Ha kani ka Meeting da e buit wa i lut neibynta u kær ya ki chrieh toh u pynkylla wow chna da ki Floodlights.
Da ong leh wa ini waroh toh i yoobeiñ ya ki paidbah heiwa i dor wa mang pynlut rap heh i bar ya ki madanbol ha ki ri Europe tangwa i sakhiat won lakam i thaw pynlehke ya ki chrieh.
Kamtæ ha kani ka yalang da iwi i sur da rai ki wow e kti ha ka Sports and Youth Sub-Committee ka seiñ yow leh yeiwa emkaam wa kynthup yow lai khang syndon da u paaid wa boon lada yoo emkaam. U dawa takit da ka CAG ka sorkar India hadooh wow lai choh dwar cha ka High Court yow takit wei wow rai yei hok ki paaid ka thaaiñ.
Discussion about this post