Yow lait ki bru u dooh u thap Vote kiwa sah cha ki chnong wym toh wa haap haka Constituency wa em Vote ki, neiliang ka Election Commission of India (ECI) da ong ko wa ha u snem 2019 haka Election cha ka Lok Sabha da em 67.4% kiwa thap Vote iwa mut hadooh 30 klur ngut ki wym yoh wow pynemkaam yei hok yong ki wei iwi na ki daw toh wa ki bru ym em rah ki ya ki Vote yong cha i chnong wa thymme wa sah ki lane lai kreh ki.
Kamtæ ka ECI da pynkhreh wow pynkrehkaam da ka Multi Constituency Remote Electronic Machine (RVM) yow yarap ya kitu kiwa em cha jngai na ki chnong wa em Vote ki wei kini ki EVM ye ki wow krehkaam neibynta 72 tylli ki Constituency na kawi donhi ka thaw thap Vote namo ka Polling Station.
Manda ye u pynkrehkaam ya kini ki kor thap Vote wa thymme daw wanrah ko yei kylla hapoh ka ri, da ong ka ECI.
Chooh chooh da pyntip wa ha ka 16 tarik uni u bnai da khut ya ki 8 tylli ki National Party kiwa da yoh yei tipmit wa 57 tylli ki State Political Party yow pynyoo ya ki kammon krehkaam kini ki Remote EVM.
Ka ECI da ong ko leh ha kani ka juk wa katni toh u pynemkaam yei stat Technology yow yarap ya ki paidbah neibhah kiwa boon hi kwah ki u neh ka Vote ki haka chnong wa em hi ki.
