Da: U Daohi Manar
Ha ka la-ær wa jem,
Najŋai sñau yeisur ‘ŋōh-dem’,
Ki sur kûrpad-kûrpon, ki kûntien kordor u siaŋ!
Man ka yuŋ khōid, yuŋ kûntaŋ.
U sûnchar yeiwa da pûnchoŋ ki syiem ki kmai,
I stad u warim, yoh u lait na i jæt i pai;
Yoh u neh i suk, u sah i yatoh-yajan…
Yuŋ Blai-wa pûnchit yei mûnsien, yeimaya u pûnkhlan.
Na tûŋkoŋ yuŋ blai, yeisuk da e ‘ti lut
Neibhah yoŋ ka chi-rûnyeiñ da raikut;
Wapli uwa duna ka yaroŋ, tûmbuiñ ka tûŋka!
Man ka yuŋ yarap, yuŋ yada.
Da lut i mûnsien, da her wei r’ŋu,
Du wa yoh u yachemlaŋ iwi don kam chipaiu;
I stad u warim, yoh u roi u par chihajar thûndai!
Yuŋ Blai-noŋrim “U kamai yei hok” kat daŋ im daŋ lai.
Yoŋ ka yap ka sa, niam ne dustur-riti,
Na yuŋ Blai u sdaŋ, yei wûrchau kti;
Yoh u pûn-eh daw-nasib, u im ‘tipbru -tipblai’!
Yuŋ Blai- Niamtre waksoh-tbat hukum blai.
Kani ka sur kûnud-ruai pûnpaw ko yei sñau-saroŋ wa i ha ri lōm Jaiñtia em i yaki ‘Yuŋ Blai’. Kiwa man ki yuŋ kûntaŋ, ki yuŋ wōw pûndep yaki hukum-adoŋ blai, ki yuŋ wa yoh u yachem ki para kur para kha, i yuŋ wa kit yei chon i khia, khamtam ha ka yap ka sa. Man i yuŋ wōw dem-ŋōh blai, hei wōw kûrpad yei em kam i dawa yoŋ i manbru. Behdieñkhlam, toh ka chaad kûrpad na u tre kirot, yōw yoh yei ker i da, i kûrkhu-khûrdoh wa sarot, kamjōh u ŋoh-dem yoh u pûnher yaka wasih-waroi ka watun-watia hapoh i chnoŋ i thau.
Kini ki ‘Yuŋ Blai, man kiwa koŋsan bha khamtam ha kani ka chaad e ŋōh. Kani pûnsaroŋ yei man kûrpaŋ ka jaitbru Pnar kawa maya ka yoŋ i.
Ka Behdieñkhlam wasuk-wakmen ya phi waroh ki khon ka Seiñraij Jowai. E wa u tre-kirot kûnrad u theh u ya i kûrkhu-khûrdoh ya warohlaŋ.
Discussion about this post