Jowai : I lai paidbah ki khynnah puræ ka Kiang Nangbah Government College cha DC hapoh i yahkhmat ka KNGCSU da man i iwa klumar hadien wa chah choh chah bom kini ki khynnah.
Nyngkong kini ki khynnah puræ da yalang chwa ki ha pchem kani ka kolej nadooh 10 waje, heipor kamwa 11:00 i step da mih ki na kani ka kolej. Weiwa chwa wow mih ki ki pulit da thmu ki u kem ya ki nongyalam ka KNGCSU, ini i leh ki pulit da pynchrai ko ya kiwa boon ki khynnah kiwa da dawa u pynlait noh ya ki.
Kamtæ ini i lai paidbah ki khynnah puræ kani ka kolej da man i iwa lai bait heiwa da ki spah ngut kiwa yachimbynta. Manda poi ki ha opis u DC da khanglad ya ki u psiah cha kani ka ophis heiwa da khang ya ka gate weiwa da em da ki phaw ngut ki pulit kiwa da ksoh dien sympat wa ki stieh.
Kini ki khynnah da pyrchang ki u psiah cha kani ka opis deibor wei da pyrchang ki leh u tyngkheiñ yabor ya ka gate. Hadien kattu katni por wa da yania hapyrdi ki khynnah wa ki bor distrik wa ki bor pulit da chah u psiah du 5 ngut ki nongyalam kiwa da yachem wa u ADM ka distrik u ma D.M. Wallang.
Hadien wa da yachem ki wa uni u heh Distrik kini ki nongyalam da pyntip ki wa ka sorkar da pynkhreh ko u pynbiang ya ki mat dawa yong kini ki khynnah ka kolej.
Ki khynnah wa boon hadien wa da dep pynsniaw ya ka kot wa khlem soi pyruit na ka ophis u DC, waroh ki khynnah kiwa em ha lait ym em pdiang ki yeitæ wa tyrwa ka bor distrik.
Dei mynsien wa chrai wei sniawsih da ya kyrsa ya kyriaw ya kbai u dawa ya ki hok yong ki. Kini ki khynnah da pynman ki da i chong kyllaiñ myngor haphrang ophis u DC. Ki bor ka distrik da pyrchang biang ki u kyntu ya kini ki khynnh wa chong ha u sarok (le lad) wow liwan, tangwa ym ngait de ki, du hadien itæ ki pulit da sdang chwa ki u siat um ya ki da ka kari tympleh diñ kawa da em chwa ha pchem ka ophis, kam ka lad wow beh ya ki neini i thaw, tangwa ym em u yut ki khynnah.
Hadien wa yoo ki bor distrik wa ym em u yut kini ki khynnah da pynmih ki da ki pulit kiwa da yien wa ki stieh ki dieñ sympat mar pyrchah kini ki khynnah. Hadien kattu katni por ki pulit da pakhot ki le tylli ki bom lyer pynjhia khmat (tear gas) cha ki khynnah, wat hadien ini leh ki khynnah da yieñ pyrchah bait ki.
U DC uwa da mih na ophis da hiar u cha sarok wei da hukum u ya ki pulit wow sympat wow dat ya kini ki khynnah (lathi charge) ha lynter u sarok ha Iawmusiang hadooh wa poi ha Lad Thomas Jones.
Ini i leh ki pulit da pyntakha pynmynsoo ko ya ki khynnah weiwa da kit ya kiwa mynsoo wa takha cha ka Dr. Norman Tunnel Hospital wow yoh yei sumar. Ha ini da em kamwa 20 ngut tam kiwa takha wei san ngut na ki da hap sah ki ha kani ka thaw sumar.
Kiwa chitom joor kiwa da duk u sah ha hospital kynthup ki ya u Ebenzar Suting, u Montecerlo Chympa, u Jersom Shylla, ka Riwanlin Timung wa ka Edakaru Sayoo.
Discussion about this post