Jowai : U DC ka West Jaintia Hills District ynne da li pait li sylli u ya ka Kiang Nangbah Government College, Jowai hei emlang u EE PWD Building ka Vice Principal ka kolej, u additional SP wa kiwi kiwi.

Ong u DC wan u cha ka koleg yow pyntikna wa lai beit ne ym em i kreh ya ka surok ka kolej, i pynmiat ya ka Boys’ Hostel wei wa da ye u wai noh ya ka Girls’ Hostel.

Advertisement ad1

U DC da pyntip u wa ya u surok yong ka kolej i kreh da sdang i wei da lai bha i chait chait cha khmat wei daw pyndep noh ha kini ki ar sngi.

Hei yatoh wa ka Boy’s Hostel ong u wa u pynchna ya ki wa jet wa pra kam ka light, ka um, niam rong wa kiwi da lai i cha khmat la ar bnai wei ha u January da ye biang ki khynnah puræ u pynemkamm biang ya ka. Ha kani ka hostel ye u sah hadooh 40 ngut ki khynnah.

Ka Girls’ Hostel ong u wa toh ka wa da baing u pynemkaam dang duna ko sa ka connection light na ka MeCL wa ka kor tan um. Ong u leh wa ki drol, ki almari ki chuki wa kiwi ki tiar toh ki wa da poi. Wei wa daw wai ya ka manda sdang u snem puræ wa thymme ha u bnai May neibhah kam i ong wa Vice Principal ym em jingmut u wai ya ka katte neibhah da jan kut u snem puræ.

Da ong u DC leh ya ka Vice Principal u thoh noh ko ya ka chithi pan pyndait lait cha ka MeECL. Hei yatoh won wa ka um da ong wa ya ka kor tan um daw pyndait noh ya ka chisien wai ya kani ka hostel neibhah kam ka ong wan u EE ka PWD Building daw em watooh ya ka kor lada pyndait noh dang katni.

Hei yatoh wa ka bos da ong u wa da dep thoh u ya ka chiti cha ka Transport Department heiwa da pan ya ka wi ka bos ka wa du neibynta ka kolej donhi. Kam wa man kattæ ka West Jaintia Hills daw yoh ko 6 tylli ki bos kamai cha nongkyndong, ong u ha ka chiti da paan u sa le tylli ki bos heiwa kawi na kini daw pynemkaam ya ka du ya ki khynnah ka kolej. Ong u lada ye ka transport department u leh ya kani te da ye u pyntoh ya ini i duna bos ki khynnah.

Hei yatoh wa i pynheh (extension of College building) ong u wa ka poisa 4.6 klur da mynjur ka sorkar u pyllait noh ka yow sdang noh i kreh. Ya kani ka building thymme daw chna thik kam i wa da em chwa ha i thaw wa em pyn hajan kolej.

Da khanna chooh chooh wa dang em leh sa ka poisa 1.66 klur ka wa da pyllait ka sorkar wei daw khut tender leh ha kini ki sngi wa daw wan. Ya kani ka poisa daw pynemkaam yow pynheh sa ya ka science block.

Hei yatoh wa ki nongkreh ophis kani ka kolej ong u wa da thung kreh ya ki hei thaw wa ym em ki sanction post i wa mut ka sorkar ym em e bor ko ya ka kolej u thung kreh ha kani ka kolej tangwa kini ki nongkreh ophis wa em 13 ngut da kreh ki nadooh u snem 1997 wei wa ym pu che bha kammon kini ki wa kreh yoh ki ya kini ki kaam. Da ong leh wa da pyntip u cha ka kolej yow pynkhreh ki ya ki kot ki sla yong kini ki wa kreh yow chem ki yi wa thung kreh ya ki. Neibhah kam wa man nachwa kini ki wa kreh da yoh tulop ki da ka ‘Pay Scale’ ka wa ym ye u man neibhah ya kini ki bru ym toh ki nongkreh wa da dep regularised. Handa la kattæ leh ong u wa ha i yachem yong oo wa ki bor sorkar ka tnat education kamjooh leh ya u Dr. R.C. Laloo ka sorkar dang bichar bniah ki wa kammon u leh ya kini ki 13 ngut.

Da ong chooh chooh u wa ka sorkar da chem ko ya kiwa boon kiwa kreh kaam ki wa em ha kolej ha ki tnat sorkar wa boon yong ka jylla. Da mih ini nadooh wa pynkreh kaam ka sorkar ya ka “Employee Database” nadooh u Kmaichonglad 2014. Deiwa pynemkaam ya kani ka database waroh ki tulop, ki loan, GPF wa kiwi ki kaam poisa yong ki nongkreh wa su tulop da ka sorkar jylla da dep computerised. Da em leh i pyntip na ka sorkar wa ya ki wa kreh sorkar ki wym em pyrtuit ha kani ka database da pyndooh tulop lut ya ki.

Hei yatoh wa i duna nongsikai ka morning section ong u wa heipor wa khut interview ym em yoh ki ya ki bru wa biang hadooh katni leh.

Share this:
Share on Facebook0Tweet about this on TwitterGoogle+0
Advertisement ad1