Changpung : Ka Shangpung Presbyterian Lower Primary School ynnin ka sngi da ko poi cha u moomer wa 150 snem hei chakri ko ya ka chnong Shangpung ha i puræ puthi.

Ya kani ka skur da seiñ ya ka ha u snem 1865 da u Don Sutnga uwi na kiwa nyngkong dooh wa kylla Kristan ha Shangpung deiwa bood u yei nuksa u Kiang Chulet. U Don hadien wa sniaw u wa em u Rev Thomas Jones II ha Jowai da lai yachem u ya oo wow yoh buit u sdang skur ha Shangpung.

U Rev. Thomas Jones II da pynchlur u ya u Don wei da phah u ya oo u sdang u ya kani ka skur.

Hadien ini u Don da lai biang u cha chnong u wei da pynlang u ya ki para Kristan ha Shangpung wei da yoh ki ya iwi i thaw wa e ka chnong iwa boon ki wa ngeit toh i wa chong ksuid. Ini i thaw man i kam i kabu ksiar ya u Don heiwa da chna u yei wi yung phlang wa khian hadooh wa kani ka skur do poi ko chadooh i kyrdan wa em ko katni.

Ha u snem 1891 u Rev. Jenkins da wan u cha Shangpung kam u Missionary wei man u leh kam u misteri wa stad bha wei da chna u sa ka wi ka yung ya kani ka skur kamjooh leh ya ka wi ki hostel ya ki chynrang wa ya ki kynthai.

Deiwa em u Rev. Jenkins kani ka skur da ku ko cha ka klas IV, V hadooh VI wei da kylla pyrtuit ya ka cha ka Welsh Mission Middle English School Shangpung.

Ha u snem 1922 u Soso Tham da wan sikai u ha kani ka skur kamjooh leh sa u wi nongthohkot Khasi wa pawnam u Babu Frank M. Pugh leh da man u kam u Headmaster wa nyngkong ya kyrdan Middle School yong kani ka skur.

Hei lehburom dap 125 snem ynnin ka sngi da wan chimbynta da ki khynnah skur wa puræ heini kamjooh leh ya ki wa da pass deilang wa ki nongsikai kamjooh kiwa da chongngiah kiwa e ya ki rwai wa ha rukom.

Da pynher leh ya u dingkum kam ka dak kynmoo i dap 150 snem da u kongsan u ma C. Ymbon. U ma Ymbon hei klam yong oo da ong wa i puræ puthi man iwa kordor bha kamjooh deiwa em ki thaw puræ puthi ha chnong yarap ko leh sa ha kiwi ki liang ya ka chnong kam hei e yungwai kamjooh ka yaw ka hat wa em ha chnong. Da ong chooh chooh u leh wa i lai puræ puthi katni ym toh yow yoh kreh sorkar neibhah ym ye u e kreh ya waroh tangwa i puræ puthi toh u man ko ka lad wow ye i u yieñ ha i yong i hi ki kjat.

Ya i parom wa tbain yong ka skur da khana da ka kong R.M. Wann, da pyllait leh ya ka kot sahkynmoo (souvenir) ynne ka sngi da u Dr. B. Langbang.

Da saam leh ya ki certificate wa ki mementos cha ki nongsikai warim, ki headmaster wa kiwi kam i dak sniawngooh ya ki snem wa da e ki nei bynta kani ka skur.

Da em leh ha kani ka sngi kiwa na yung u Soso Tham heiwa ka kong Dr. M.Y. Tham da e khublei ko ya ka skur deiwa ong wa yooluti ka skur daw poi ko sa kawi ka 150 snem. Kamjooh leh sniawngooh ko ya ka skur wa ka chnong Shangpung wa ye ko u e mynsien ya u Soso Tham u thaw ya ki wa boon ki poitry yong oo hei por wa em u ha kani ka skur.

Chwa u kut ka yalang da wai leh ya u moo sahkynmoo ya ka lehkmen Sesquicentennial Jubilee Celebrations. Da e leh ya ka memorandum cha u ma C. Ymbon da ka skur yow yarap poisa ya ka skur u chna ya ka School Hall.

Share this:
Share on Facebook0Tweet about this on TwitterGoogle+0
Advertisement ad1