15 49.0138 8.38624 1 1 4000 1 http://wyrta.com 300 0
Advertisement ad1
Advertisement ad1

Pyrchah ka STEDS yei thmu ka Star Cement wow tih moochuni ha Brishynrot

0 Comments
Advertisement ad1

Jowai: Ka Sonapyrdi Tourism & Economic Development Society (STEDS), East Jaiñtia Hills, ynne ka sngi da thoh ko cha u Member Secretary ka Meghalaya State Pollution Control Board yow pynsñiaw yei pyrchah ya i thmu ka Star Cement wow sdang yaka thaw tih moochuni ha i thaw wa heh 42.051 Hectare wa em ha Brishynrot, East Jaiñtia Hills District.

Ka STEDS da ong ko wa i thaw wa thmu wow tih moochuni wa em ha Brishynrot toh jngai i du kamwa 500 meter naka wah Lunar wei manda tih moochuni daw poi boon ki jakhlia cha kani ka wah kawa tooid won cha ka wah Lukha iwa daw pynyap ya waroh ar tylli kini ki wah. Ka wah Lukha man ko kawi na ki thaw uiñke suwari wei katni kani ka wah da sdang im biang ko wei deiwa kreh chitom ka Society da ye leh u pynkhooid ya ka wei da sdang ko leh u man kam ka laad kamai ya ki paidbah kani ka thaaiñ.

Advertisement ad1

Ka seiñ da ong ko leh wa ka Narpuh Wildlife Sanctuary em ko hajan kani ka thaw wa thmu wow tih moochuni kawa man ka khloo thaw rieh thaw dem ki Hoolock Gibbons kiwa man leh ki jait mrad kiwa da em hei maa, wa kiwi ki jait mrad nadooh ki sim, ki thawalieh, ki jait syntu wa ha rukom kawa katni da taan ki ya kiwa boon ki bru kiwa lai thooh bniah (Researcher), ki bru maya rymaw hadooh kiwa chna phlim, kamtæ kani ka Wildlife Sanctuary hap yada yaka na ini i tih moochuni.

Ka STEDS da kdaw ko leh yeiwa em ki krem hapoh ka thaaiñ Narpuh kam ka Liat Hati, Kotsati wa kiwi kiwi kiwa man leh kam kiwi na kiwa jrong dooh hapoh pyrthai kamjooh kiwa pawnaam tangwa nadooh wa sdang wow tih moochuni ki karkhana pynmih khyndaw-bilat wei i pynheh ma pynheh ya ka thaw tih moochuni daw ktah ko ya kini ki krem hadooh wa daw wiar ki.

Ka seiñ da pynkynmoo ko leh yei kylla rong ka wah Lukha cha i rong suiñ bneiñ iwa da jia da boonsien hadooh wa da yap ki doh um iwa da jia na i pyllait jakhlia ki karkhana pynmih khyndaw-bilat, wei lada e bor yaka Star Cement wow sdang ko wow tih moochuni ha kani ka thaw wa thmu, daw ktah ko ya waroh nadooh ka rymaw hadooh ki paidbah khamtam yaka juk wow wan khamtam hei ku i chit ka pyrthai ha ki chnong wa em hapoh ka Elaka Narpuh nadooh iwa wan ki karkhana pynmih khyndaw-bilat.

Kamtæ ka STEDS da pynsñiaw ko yei pyrchah yei thmu ka Star Cement wow sdang u tih moochuni ha Brichynrot.

Also Read: Phooh ka tamasa Lukha Festival wa ar sngi wa pynman da ka STEDS

Advertisement ad1

0 Comments

Leave a Reply