15 49.0138 8.38624 1 0 4000 1 https://wyrta.com 300 0

Phooh ka tamasa Lukha Festival wa ar sngi wa pynman da ka STEDS

0 Comments
Advertisement ad1

Jowai: Ka Sonapyrdi Tourism & Economic Development Society (STEDS) da pynman ko ya ka Lukha Festival ha ka 1 wa 2 tarik uni u bnai deiwa krehlang waka Meghalaya Rural Tourism Forum (MRTF) harood ka Wah Lukha, Umpasu Sonapyrdi, East Jaiñtia Hills District Meghalaya.

Da wan wai pyrda ya kani ka tamasa da u Kyrmen Shylla uwa man kam u montri sorkar wa pait ya ka ka chnat Social Welfare, Revenue wa Disaster Management hei emlang u Emlangky Lamare kam u symbood kongsan uwa man leh kam u kyrtong ka UDP na Narpuh Constituency. Da emlang leh u Kordor Sympli uwa man kam uwa e buit ka UDP ka East Jaiñtia Hills District, u Radius Lapasam General Secretary ka UDP East Jaiñtia Hills District, u Dolloi ka Elaka Narpuh u Manbha Lyndoh wa ki waheh chnong yong ki chnong waphær waphær wa em ha ka thaaiñ Elaka Narpuh.

U President ka STEDS u Daiapherbha Lamare ha i klam pdiang u da khana u wa i pynman ya ka Lukha Festival toh wow pynku ya ka kaam uiñke suwari ha Sonapyrdi khamtam ha ka wah Lukha wa ha Narpuh Wildlife Sanctuary leh. Da batai u wa i thaw man i iwa bha wow riñ ya kiwa uiñke suwari neibhah man ko chajan ka jylla kam ka Assam, Tripura, Mizoram wa Manipur. Da kyrpaad u leh ya u Kyrmen Shylla wow yarap yaklam waka sorkar khnang wow yoh ya ki Special Package kamwa da yoh ki thaw wa em ha Garo Hills khnang wa i thmu yong ka STEDS wow pynyoh kreh ya ki bru u man sakhiat ko kamwa da angnood da ka dorbar chnong Sonapyrdi.

Da e leh ya ka dorkhat cha u kongsan ha kani ka sngi.

U Kyrmen Shylla da kular u wow yarap yaklam wa ka sorkar khnang wa kani ka seiñ u yoh ko ki laad yarap na ka sorkar khnang wa ki bru kiwa chong ha Sonapyrdi u yoh khih ki na kiwa wan uiñke suwari ka pyrthai. Da yaroh u leh ya ka STEDS kawa da pynman ya kani ka Lukha Festival neibhah da kani ka Tamasa daw pynpawnaam ko ya kani ka thaw.

U symbood kongsan u Emlangky Lamare da kular u wa lada poi u cha ka thong daw yarap u ya ka STEDS yow ye ki u poi cha ki thong wa da booh ki yow man kani ka thaw wa pawnaam ha Meghalaya.

Da yoh leh yei klam na u Dolloi ka Elaka Narpuh, na u General Secretary ka Elaka Narpuh wa na ki waheh chnong waphæR waphær kiwa em ha ka thaaiñ Elaka Narpuh.

Ha kani tamasa da em ki yalehke wa boonjait wa pynwyrngai ya ki paidbah kam ka yakob yimpa kawa jop da u Deiny Lamare, ka ngam um kawa jop da u Wanbha Rymbai, ka yakop kiñ lieñ wa jop da u Rihok Rymbai katwa ha ka Futsal Beach Competition da jop da ka DG Game na Chiehruphi.

Da pynman ya ka lai kjat (Trekking) chapoh ka Narpuh Wildlife Sanctuary hapoh i ya pynbait wa u Alan West uwa man leh kam u Chairman ka Meghalaya Rural Tourism Forum kawa da wan chimbynta na kylleiñ ka jylla.

Ha i por miet da pynchongchit da kiwa chaad wa pawnaam hapoh ka jylla wei da pynman ya ka yakob Miss Narpuh 2019 kawa nyngkong ha ka thaaiñ, ka Fashion Show heiwa da em ki Model wa pawnaam ka jylla kam ka Nadia Mary Syiemlieh, ka Glorisa Nongpluh, u Heipormi Suchiang, ka Hundaka Lhuid wa kiwi kiwi.

Da wan pynkut ya kani ka Lukha Festival da u Hopeful Bamon uwa man u MLA warim ka thaaiñ uwa man kam u Co-chairman ka Meghalaya State Planning Board uwa da saam ya ki khusnaam cha waroh kiwa jop ha kani ka tamasa.

Neiliang yong oo leh da kular u wow yarap wa ka sorkar jylla khnang wa ka STEDS u yoh ki laad yarap na ka sorkar wow pynbha, pynmiat chooh chooh ya kani ka thaw.

0 Comments

Leave a Reply