Ka lehkmen dap 50 snem namo ka Golden Jubilee (1975–2025) ka Nartiang Presbyterian Higher Secondary School, Modop dapoi ko cha wakut ynne ka sngi deiwa wan wow embynta wa u Chief Minister, u Conrad K. Sangma kam u kongsan, u Deputy Chief Minister, u Sniawbhalang Dhar kam u symbood kongsan chirup wa u Thombor Shiwat, CEM, JHADC; u Tbn. H. Khynriam, Chairman, SMC, ka I.J.R. Tongper, Principal wa kiwi de.
U Conrad hawa e yei klam da e khublei u ya skur wa dapoi ko ha uni u moomær wa 50 snem deiwa kitbok leh wow yoh chooh chooh chiboon tylli ki snem wei da e yaroh u leh ya waroh kiwa da embynta nadooh ka imlang sahlang kiwa da kreh chitom yow pynku ya ka skur.
Da ong u wa nadooh u snem 2018 ka mang poisa neibynta ka puræ puthi da ku ko na ₹2,000 klur chi snem cha ka ₹3,500 klur chi snem.
Da e nongmuna u wa ha Tripura kawa em palat 45 lak ngut ki bru da em ko kamwa 4,000 tylli ki skur, ha Manipur kawa sariem i boon bru kam ka Meghalaya em ko 5,000 tylli, ha Nagaland 4,000 tylli katwa ha Meghalaya em ko palat 14,000 tylli ki skur heiwa kiwa sikai da em ki 55,000 ngut.
Tangwa da ong u wa em 206 tylli ki skur kiwa biang kiwa sikai tangwa ym em khynnah skur ki wei kamwa 2,000 tylli won em ki 5–7 ngut kiwa sikai katwa ki khynnah em uwi hadooh 5 ngut donhi.
U Conrad da pynbna u leh ya ka poisa yarap wa ₹20 lak na ka Chief Minister’s Special Development Fund yow chna pynheh ya ka skur.
Neiliang u Sniawbhalang da ong u wa i lai luti ka skur ymtoh kawa suk heiwa da hap wow maad chiboon i eh i khoo tangwa ynne won dapoi cha i bynta wa kmen deiwa yooluti u leh ki khynnah ka skur daw man ki kam ki Doctor, ki Engineer, kiwa yahkhmat paidbah, kiwa hoi khih hoi khan yow wanrah burom ya ka chnong.
Discussion about this post