Ka Eastern Zone Bench yong ka National Green Tribunal (NGT) ha ka 2 tarik u April da pynsangeh ko ya ka hukum ka sorkar Assam wow phah ya 1,600 ngut ki chipai na ka Assam Forest Protection Force (AFPF) neibynta ka Assembly Election wow man ha ka 9 tarik uni u bnai.
U Justice Arun Kumar Tyagi wa u Expert Member, u Ishwar Singh da ong ki wa ini i leh ka sorkar toh iwa sih hakhmat ka aiñ heiwa da phah ko ya ka Notice cha ka sorkar Assam, ka Ministry of Environment, ka National Biodiversity Authority, u Principal Chief Conservator of Forest wa u Special Chief Secretary heiyatoh wa ini.
Ka Assam Forest Department ha ka 29 tarik u March da pynmih hukum ko wow phah ya ki chipai AFPF wow lai leh Duty hapoh i pait u Additional Director General of Police nadooh ka 3 tarik u April wei u liwan won ki ha ka 10 tarik u April.
Ya kani ka mukotduma da ujor da u muktiar, u Gaurav Bansal deiwa kdaw wa man ko pyrchah ya ka hukum wa mih ha u May 2024 na Supreme Court wow khang ya ki jylla wow pynemkaam ya kiwa kreh kamjooh ki kari ka chnat Forest cha ki kaam wym yatoh wa ki khloo.
Da ong u leh wa ini i leh man i pyrchah ya ka aiñ Biological Diversity Act, 2002, kawa klam che wa emkaam u pteiñ i yada ya ki khloo kam ka Kaziranga National Park.
Deiwa chimkhia yeini wei wa jhan i kaam, ka NGT u chong bichaar biang ko ya kani ka mukotduma ha ka 6 tarik u April.
Discussion about this post