U Symbood Montri Rangbah ka jylla, u Sniawbhalang Dhar, da e yarap u ₹50 lak neibynta u chna ya ka Girls’ Hostel yong ka KJP Synod Mihngi ha Cleve Colony, Shillong kam wow kyrchaan ya ka puræ puthi wa i bha i miat yong ki khon ka Balang.
Da kani ka poisa daw yarap leh wow pynheh ya ka kani ka Hostel kawa dang chna yow pynman ya ki thaw sah wa chngaaiñ wei kawa biang neibynta ki khynnah kynthai kiwa wan puræ ha Shillong khamtam ya ki khon kynthai yong ka Balang kiwa wan na ka manyung wa dooh wa duk.
Kiwa yahkhmat wa ki dkhot yong ka KJP Synod Mihngi da pynsñiaw ki yei sñiawngooh wa khroo wa i sñiawkmen yeini wa da yarap u Symbood Montri Rangbah uwa da kyrchaan bha ya ka jaitbru wei uwa burom ya waroh ki niam, u wym jooh leh chiliang ya kawon kawon ka niam wei pynyoo u leh yei maya jaitbru wei em i mynsien yatylli ha ka imlang sahlang.
Ka Khasi Jaintia Presbyterian Synod Mihngi da pdiang sñiawbha ko yeini i yarap wei da ngait ki wa kani ka Girls’ Hostel daw man ko i yarap wa khroo neibynta kiwa boon ki kynthai wa wan cha Shillong yow pteiñ yei puræ puthi yong ki.
Yeini da pynbna u Sniawbhalang Dhar ha ka KJP Synod Mihngi wa da pynman ha Balang Presbyterian Mowtyrchiah ynnin ka sngi.
Discussion about this post