Pynchoh biej kiwa na Sikkim ya ka Chaad Sukra ha Madan Pynchongngiah Dieñkhlam ha Iawmusiang

Ynne ka sngi kam chibynta ka lehkmen Chaad Sukra 2026 ka Raij Jowai, hadien wa kut ka yalang wa i chaad na Madan Ryngkaw, ki khon ka Seiñraij Jowai da pynman ki ya ka mih yaaw.

Ha ini i mih yaaw da chaad tymbud luti kat hadooh wa poi ha Biar ka Blai heiwa da em le tylli ki chaad na ka Dulong, Chyrmang wa Loomiongkjam wei neini won da mih biang wow lai cha Iawmusiang.

Manda poi ha Iawmusiang ha Madan Pynchongngiah Dieñkhlam da em ka yalang heiwa u Montri ka sorkar jylla, u Sanbor Shullai da man u kam u kongsan.

Kam u kongsan u Sanbor da e khublei Chaad Sukra u ya waroh wei da kitbok kitrwiang u ya ka Seiñraij Jowai.

Manda kut ka yalang da em biang ka yalang pynwyrngia deiwa yoh ya ki chaad na ki chnong hapoh Raij Jowai, na ka Seiñraij Shangpung, Ummulong, Shillong kamjooh ka dhab na Sikkim kawa da pynman ya i chaad Yak Cham namo Yak Dance iwa da pynchoh biej ya kiwa boonwalang.