Ka yung bichaar ka West Jaiñtia Hills District da pynmih ko ya ka hukum ha 27-10-21 yow phah kset patok ya u Sujit Deb Nath hapoh ka kyndon Section 6 ka aiñ POCSO deiwa phah kset patok oo 10 snem wa 7 snem hapoh ka kyndon 376 ka IPC deiwa khor bha (Rigorous Imprisonment) deilang waka kuna wa mar T. 20,000 hapoh kini ki ar kyndon.
Ya ka 7 snem waka 10 snem u pynlut u ki hapoh patok heijooh i por.
Ini toh hajrong ka FIR wa da e ha ka 05-08-13 da kawi hakhmat ka Umkiang Police Patrol Post deiwa pynbaad ya u Sujit Deb Nath wa slaitbor u ya kawi ka khynnah.
Ha ka FIR da ong wa ha ka 04-07-13 kawi ka khynnah kawa em dang 13 snem i rta kawa ri da kawi ka bru ha iwi i chnong ha West Jaiñtia Hills da yut ko nei yung yong ka cha i yung kawa lai ujor FIR.
Hadien wa thmu wow li booh biang ya kani ka khynnah cha i yung ko, kani ka khynnah ym bein ko deiwa ong wa u kurim ka bru wa ri ya ka daw dat u ka wei hadien wa kylli bniah da khana kani ka khynnah wa u kurim ka bru wa ri ya ka da slaitbor u ka wei da maham u ka wym toh u khana ko cha kiwon kiwon. Kamtæ ya ka takit da leh da ka Jowai Police Station.
Ha kawi won ka hukum kawa da pynmih ha ka 05-11-2021, ka yung bichaar da phah kset ko chi rta ya u Edwin Sungoh deilang waka kuna wa T. 50,000 hapoh ka kyndon 302 ka IPC.
Ini toh hajrong iwa jia ha ka 14-05-92 heiwa arngut ki bru kitæ u Lur uwa tip leh kam u Lo Rabon waka Lakma kawa tip leh kam ka Kma Sungoh kiwa da chah tynyap hapoh i yung yong ki hi wa em ha Khliehrangnah Lum Moochai deiwa chah pam da ka wait ha u Edwin Sungoh heiwa yei metyap da ieh pyn hapoh ini hi i yung.
