Jowai: Ki dkhot ka Meghalaya Junior & Senior Team kiwa yalehke Muay Thai da leh bha ki ha ka Muay Thai National Championship 2018 wa pynman da ka United Amateur Muaythai Association of India (UAMAI) ha Pathare Stadium, Pune Maharashtra nadooh ka 15-18 uni u bnai heiwa da yoh ki 5 tylli ki takma ksiar, 3 tylli ki takma rupa wa 2 tylli ki takma tama.
Ka Narimon Nongrum kawa yakhun ha ka kyrdan hapoh 38 Kg 16-17 Years Junior Category waka Monica Nongrum kawa yakhun hapoh 63.3 Kg Senior Women da yoh takma ksiar ki ya ki kynthai katwa ka Ishadora Thongni kawa chimbynta ha ka kyrdan 45 Kg 14-15 Years Junior Category da yoh takma rupa ko.
Ha ki chynrang won u Mightyson Nonglang uwa yaleh ha ka hapoh 48 Kg 14-15 Years Junior Category, u Blaseibok Kharbuli uwa chimbynta ha ka hapoh 45 Kg 16-17 Years Junior Category wa u Alfred Watklet Riahtam uwa yakhun ha ka kyrdan hapoh 42 Kg Senior Men da yoh takma ksiar ki katwa u Babit Kharsahnoh uwa chimbynta ha ka kyrdan hapoh 45 Kg Senior Category wa u Dauni Nongrum uwa yakhun ha ka hapoh 54 Kg Senior Category da yoh takma rupa ki.
U Evinstar Nongspung uwa chimbynta ha ka hapoh 56 Kg 14-15 Years Junior Category wa u Tonroi Suting uwa yakhun hapoh ka hapoh 51 Kg Senior Category da yoh ki ya ki takma tama ki.
Kini kiwa yoh takma da chah jied ki leh wow chimbynta ha kini ki International Tournament yong u snem 2018-19:
- Asian Muaythai Championship 2018 nadooh ka 4-12 u Kmaichonglad (Dec) ha Forum, Macau.
- World Muaythai Day 2019 ha ka 17 u Thohlakhmi ha Ayutthaya, Thailand.
- Arafara Games 2019 nadooh ka 26 u Naitung (April) hadooh ka 4 Naisan (May) 2019 ha Australia.
- World Muaythai Championship 2019 nadooh ka 20-28 Naiynñaiw (July) 2019 ha Bangkok, Thailand.
- World Martial Arts Mastership 2019 nadooh ka 30 u Naisaphra (Aug) hadooh ka 2 u Naikhynde (Sept) 2019 ha Korea.
- World Youth Muaythai Championship 2019 ha Antalaya, Turkey heiwa ya ka tarik daw pynbna hadien.
Discussion about this post