Kiwa lai puræ ka Khad-Ar Daloi College, Jowai ha uni u snem da wanrah burom ki ya kani ka thaw puræ aiñ wa du ka donhi wa em ha Ri-loom Jaiñtia heiwa na ki 15 ngut kiwa yaleh ya ka LL.B 6th Semester 2023 wa da pynman da ka NEHU, 12 ngut da yoh 1st Division ki, 7 ngut da psiah ki haka Top 10 wei yei nam Topper leh da yoh da uwa na kani hi ka College.
Na kini kiwa da lehbha kynthup ki nadooh kiwa sikai skur, kiwa kreh sorkar wa uwi uwa man kam u MCS uwa da yoh hei kyrdan wa ynñiaw wa uwi na ki khloor yalehke Kick Boxing ka Ri-loom Jaiñtia, u Hame Shaniah Suiam uwa da yoh hei kyrdan wa san.
U Topper namo uwa yoh nyngkong toh u Wanbhalang Buam uwa kreh hapoh ka Khliehriat District Court kam u LDA Cum Bench Assistant wei nachwa jooh kreh u hapoh ka Swachh Bharat Mission ha East Jaiñtia Hills kamwa san snem wei uwa na chnong Umladthakur, West Jaiñtia Hills.
U Wanbhalang da khana u wa da slem kwah u wow lai puræ ya ka aiñ tangwa du ha u snem 2020 hadien wa ka Principal warim kani ka College da ye ko wow pynbor ya oo wow lai puræ hapoh kani ka College tæ leh u yeini heiwa katni da yoh u poi cha kani ka kyrdan wei da pynsñiaw u leh yei sñiawngooh ya kani ka College.
U Rapborlang Kharbihkhiew uwa man kam u MCS da khana u wa da boonsien da puræ aiñ u tangwa neidaw wa boonkaam u ym ye u wow pyndep wei kam u MCS nachwa hap pait ki chiboon ki kaam wa yatoh wa aiñ wei da chem chitom wow leh yei kaam khlem da tip ya ka aiñ kamtæ manda poi ha kani ka College da ye u wow pyndep wei da pyntip u leh wa da pynkhreh u wow lai puræ sa ka LL.M kamtæ da pynchlur u leh ya kiwi wow pyrchang wow lai chakhmat hei puræ puthi.
U Dr. P.M. Passah, President ka Governing Body ka College da khana u ya chiboon i eh i khoo wa da maad ka College nadooh kiwa toh u chna u tei ki wym poi thong wei ynnin u snem da chah pynngat ki da ka kuna kawa Rs. 35 lak ha ka Bar Council of India (BCI) khlem da em iyi iyi i bakla ka College tangwa iwa bakla da ka BCI hi. Wei yeini da lai li ood leh cha u Montri Rangbah ka jylla uwa da kular wow u yarap waroh kani ka poisa tangwa tang chi tangka leh ym pu em poi hadooh katni.
Neiliang won u Phasmon Dkhar uwa man kam u EM wa pait ya ka Civil Works Department ka JHADC da ong u wa lada emkaam ka College wow pynchna iyi iyi wow phah kot ki cha oo wei daw yarap u katwa chah i bor wei katwa em poisa ka Council.
Da e khublei u leh ya waroh kini kiwa da poi chakhmat wei da khana u wa oo leh toh uwa da jooh lai puræ ya ka aiñ tangwa neidaw wym chah i por ym em ye u wow pyndep wei da yooluti u wa ha kawi ka sngi daw ye u wow pyndep yeini neibhah kam uwa mihkhmat paidbah daw yarap bha i.
Ka kongsan ha kani ka sngi, ka Santa Mary Shylla, MLA ka Sutnga-Saipung da e khublei ko leh ya kini waroh kiwa da poi chakhmat hadooh wa yoh nyngong wow man kam u Topper wa mih napoh kani ka College kawa boon ym tip ki tang wa em kam kani ka College cha i wei da pynchlur ko ya ki wow lai chakhmat yei kaam wa bha yong ki.
Ha iwi won i liang da ong ko wa sñiawsih u yoo wa hadien 6-7 snem wa wan ko cha kani ka College dang neh kamjooh bait ym em iyi iyi i thymme wei ini i pynkup burom ynne da pynyoo yei kreh chitom yong waroh iwa da ye wow wanrah kat da ini i burom.
Kamtæ da kyntu ko wa ya ki bor pynlai kani ka College wow thoh cha ka wei katwa ye i bor wei katwa dang em ko katni hei bor yow leh ko yeiwa emkaam yow wanrah yei kylla ha kini ki snem wow wan.
Kam wow pynkynmoo wa ini ymtoh i sien wa nyngkong wa yoh ka Khad-Ar Daloi Law College yei naam Topper heiwa ha u snem 2019, ka Sawaka Kynjing da yoh ko yei naam Topper.
Discussion about this post