Ka Saudi Arabia da pyntip ko wa da em kamwa 1,301 ngut ki bru wa yap heipor wan ki wow chimbynta ha ka Hajj kawa dang dep wow pynman ha uni u bnai deiwa ong leh wa em kiwa wan khlem da yoh bor kiwa da lai dei kjat heipor wa joor bha i chit.
Ka Hajj ha uni u snem da jia ryngkhat ko heipor wa joor bha i chit iwa dapoi palat 50°C wei kamwa le pawa na kitu kiwa yap toh kiwa khlem da yoh bor wow wan cha kani ka Hajj wei da hap ki wow chah sngi khlem da yow thaw rieh.
Na kiwa yap toh kiwa da heh rta wei kiwa da em chwa i chitom.
Kani ka Hajj toh kawa pynman chisien chi snem heiwa ki Muslim da lai ki cha Mecca yow pynman yei ngooh i dem iwa toh u leh ki ym duna ya chisien chi rta ki.
Ha uni u snem kiwa chimbynta da em ki 10.8 lak ngut ki bru na kylleiñ ka pyrthai heiwa ki thaw sumaar da hap sumaar ki ya kamwa 5 lak ngut wa kynthup ya ki 1,40,000 ngut kiwa da wan khlem da yoh bor kiwa da chah ktah nei joor ware i chit.
I chit ha Mecca ha uni u snem da em i por poi i hadooh 51.8°C katkam wa pyntip da ka National Meteorological Centre ka Saudi Arabia.
Na kiwa yap da em 658 ngut na Egypt, palat 200 ngut na Indonesia katwa ka India da pyntip ko wa em 98 ngut wei kiwi ki ri wa da pyntikna wa em ki bru yong ki wa yap toh ka Pakistan, Malaysia, Jordan, Iran, Senegal, Sudan wa Iraq.
I em kiwa yap ye u wow nang ku neidaw wa em boon kiwa khlem yoh bor ki wym pu em tip lut ki.
Hapoh ka ri Egypt, ka sorkar da pyndam ko ya ki Licence ki 16 tylli ki Company kiwa da leh pyrchah aiñ yow pynpoi bru cha Mecca. Ka ri Jordan leh da leh ko ya i jooh ya kitu kiwa emkti ha ini i kaam.
I rukom pynbait katwon ngut ki bru wa ye u wan leh ya ka Hajj toh deiwa booh da ka bhah namo ka Quota System wei ki bru wa chah jied toh deiwa pynkhle nasib.
Tangwa em hi ki bru wa lai bait khlem da yoh bor wei kiwa leh kamni ye ki u chah kem ki wei u chah beh napoh ka ri.
Discussion about this post