U Montri Rangbah ka jylla, u Conrad K Sangma da ong u wa i thungkaam ha ki 1301 tylli ki kaam wa lait lyngba ka Meghalaya Public Service Commission (MPSC) toh kiwa dang yaleh wow pyndap noh. Da ong u leh wa daw pyrchang wow pynman noh ya ki Interview rap smat katwa ye.
U Montri Rangbah da ong u ya ini hawa jubab yeiwa kylli da u MLA ka Mawlai, u Process T Sawkmie hapoh ka dorbar ynne ka sngi.
Hawa booddien yeiwa jubab, u Process da pynsñiaw u yei sñiawkhia yei pynslem ka MPSC wow khut ya ki Interview.
Hawa jubab won yeiwa da kylli da u MLA ka Mawsynram, u Himalaya M Shangpliang, neiliang u Conrad da ong u wa i pynslem wow pynman ya ki Exam yong ki kaam wa lait ha ki 2-3 snem toh neidaw wa wan ka khlam COVID-19 wa i pynmih hukum da ka kachari Meghalaya High Court wow pynkrehkaam ya ka Roster System.
Ha i jooh i por u Montri Rangbah da ong u wa ka sorkar dang pyrkhat ko yei thmu wow pynthymme yei rukom krehkaam hapoh ka MPSC, deiwa khana leh wa da em ki tyrwa wow pynbha ya ki rukom krehkaam da ki stat Technology thymme wei wow pynman kawi ka Exam neibynta waroh ki jaitkaam kiwa emkaam ka jooh ka kyrdan puræ lyngba ka MPSC wei wow booh rap boon ki Exam Center.
