Ynne i step ka 20 tarik u January, heipor kamwa 3:00 waje, ki pulit ka West Jaiñtia Hills Police Special Team deiwa emlang u waheh chnong wa ki VDP ka chnong Demthring, da yoh ki wow kem ya soo ngut ki Bangladeshi deilang wa kawi kari wa em Number ML-04D-7339 wa yah da u Vishal Dkhar uwa na Dawki.
Ya kani ka kari da kdong ka nadooh na Lad Demthring hadooh wa poi hajan ka Sanmala Guest House, Amlarem.
Ha ini da yoh ki pulit leh wow kem ya ar ngut kiwa na India kiwa man kam ki dalal kitæ u Meban Dkhar wa ka Melari Rasmut kiwa da yoh wow kem ha Lad Demthring deilang ka kari ki kawa em Number ML-04D-4739.
Hawa takit ya u Meban Dkhar, da khana u wa da em sa le tylli ki kari wa kit ya ki Bangladeshi kiwa lai luti na Jowai cha Dawki, kamtæ ki pulit da pynman ki yei pynsangeh kari hajan ka yaaw Amlarem wei heipor kamwa 3:45 i step da yoh wow kem ya le tylli ki kari. Kawi toh kawa em Number ML-05AD-6424 wa yah da u Blessing Pamthied uwa na chnong Jarain, kawi won wa em Number ML-04D-4993 wa yah da u Twel Rongngi uwa na Shkentalang wei kawi won toh kawa em Number ML-04E-0640 wa yah da u Rimi Lyngdoh uwa na Shkentalang hi wei kini ki kari toh kiwa kit ya 14 ngut ki Bangladeshi.
Waroh da em 18 ngut ki Bangladeshi kiwa da chah kem, ar ngut ki dalal wa 5 ngut kiwa yah kari deilang 5 tylli ki kari kiwa da yoh ki pulit.
Ya waroh kini da pynngat hapoh ka aiñ Immigration and Foreigners Act, 2025.
Discussion about this post