Ka World Tuberculosis Day da kynmoo ya ka da ka yung krehkaam ka District Tuberculosis Control, West Jaiñtia Hills District, Jowai ha ka yalang wa pynman ha District Library Mynthong, Jowai ynnin ka sngi hajrong ka phang, “Yes, We Can End TB: Commit, Invest Deliver” heiwa ka Additional Deputy Commissioner, ka DV Lyngdoh da man ko kam ka kongsan.
Hawa e yei klam, ka D V Lyngdoh da ban joor ko yei emkaam wow chem smat ya ini i kjut wei i pynsñiawthooh kammon u yakhun pyrchah ya ka TB neibhah wa man ka kjut kawa ye u yait wei wow sumaar kamjooh.
Hawa klam ya ki khynnah, da kyntu ko ya ki wow man kiwa syndong yei chait i khiah, wow pynneh yei khooid i jngiar deiwa kynmoo ya ka thong wa i angnood ka mynried yong ki.
Da kyntu ko leh ya ka imlang sahlang, kiwa kreh ha i chait i khiah wa kiwi ki thaw puræ wa ki yung krehkaam wow pynsñiawthooh ya kiwi hajrong ka kjut TB.
Ka Dr. Ns. C. Tariang, MOTC Jowai TU, Panaliar, Jowai, da ong ko wa emkaam wow smat u pyndooh ya ka kjut TB, wei hanla booh thong ka India wow pyndooh ya ka kjut TB ha u 2025, dang em chiboon ki bru ha ka District wa em ya kani ka kjut iwa pynman yei wym ye u pyndooh ya ka kjut ha uni u snem.
Ka Dr. Tariang da khana ko leh yei daw wa emkaam u chem smat ya i kjut yow yoh u e sumaar smat deiwa ban joor yei emkaam wow krehlang yong waroh.
Da e khublei ko ya kiwa sikai, ki khynnah wa kiwa kreh ha ki thaw ri khynnah wow man kiwa pteiñ u kreh wow pyndooh ya kani ka kjut wa kiwi de wa emkaam khnang wow poi cha ka thong.
Ka Dr. L. Marbaniang, Nodal Officer, National Tuberculosis Elimination Programme (NTEP), East Jaiñtia Hills da klam ko hajrong ki dak ki chin wei kammon wa emkaam wow smat u chah sumaar.
Ha kani ka sngi da saam leh ya ki khusnaam cha kiwa kreh ha i chait i khiah kiwa na West wa East Jaiñtia Hills kiwa da kreh hei wow pyndooh ya kani ka kjut.
Ya i naam Best Treatment Supporter da yoh da ka Baita Lapasam na Barato PHC wa ka Deciple Pychiang na Sutnga CHC.
Yei naan Best Lab Technician da yoh u Margeet Lyngdoh na Dawki PHC wa ka Wanrika Sutnga na Khliehriat Civil Hospital.
Yei naam Best Performing ASHA da yoh da ka Jenitris Lamare na Barato PHC, ka Amalia Lakiang na Loomkyrwiang UHC wa ka Kimeri Bareh na Jalaphet HWC, Sutnga CHC.
Yei naam Best MLHP da yoh da ka Darihun Kahrjahrin na Barato PHC wa ka Sumarlin Laloo, na Iongkaluh, HWC, Pamrapaithlu PHC.
Ka District Tuberculosis Center, Jowai da pynman ko leh ya ka Drawing Competition hajrong ka phang kani ka sngi heiwa yei naam jop da yoh da ka Sanly Chyrmang na Children’s Home Girls, Jowai, hei wa ar da yoh ar ngut kitæ ka Sanwaka Challam wa ka Nangbah Nangjngi kiwa na Children’s Home, Jowai katwa yei naam wa le won da yoh u Resolve Dhar, na Chilliangraij SSA School, Jowai wa ka Ibakordor Hadia na Dulong SSA UP School.
Ya ka Best Placard da yoh ka Loompyrdi Iongpiah, UPS, bood sa ka Pohmusniag UP School hei wa ar katwa yei naam wa le da yoh ka Dulong SSA UP School.
Da pynman leh ya ka Rally kam chibynta ka World TB day wa sdang na Madan Dulong, Jowai wei da pynkut ha District Library Mynthong, Jowai heiwa ki khynnah da ksoh ki ya ki kot rben wa thoh ya ki kyntien chaphang ka kjut TB dei synraan kiwa sikai wa kiwi.
Da pynbna leh wa da em 19 tylli ki chnong ha West wa East Jaiñtia Hills kiwa da lait na ka TB namo ki TB Free Village neibynta u snem 2023- 2024.
Discussion about this post