Hadien wa rai ka sorkar pyrdi hajrong ka phang wa ye ki bru wow yoh myntoi na ki jait Scheme yong ka deiwa emkaam ya u Aadhaar, da sakhi yei chimkhia ki bru wow wan chondur ya u Adhaar khamtam ha Jowai.
Ynne ka sngi nawon hapyrdi u slap wa ka la’ær, i miet i synyaaw yang da ki phaw ngut ki bru ha Gate ka Post Office Jowai du wow yoh u chondur Aaadhaar donhi dei step mynstep.
Hawa yaklam wa uwi u bru uwa na Pohhali, Jowai u S. Phawa da ong u wa da yang u hadooh ynne la kattu katni sngi wow yoh u chondur wei i daw wa da wan yang u kamni toh hadien wa pynmih hukum ka sorkar heiyatoh wa ki Card Rachon wa ye u yoh toh du lyngba ka Aadhaar donhi.
Neiliang ka D. Sariang kawa na Nongjngi Khliehchnong, da ong ko wa da yang ko chirup wa ki lok yong ka kattu la kamwa 2 miet tangwa manda poi hei step da dooh ki wow chondur du neidaw wa da em kiwa knieh wei yohchwa ya ka pali yong ki.
Da em napyrdi kiwa yang wow chondur Aadhaar toh kiwa kwah u yoh Card Rachon, da em leh kiwa kwah u yoh mybtoi ya ka bai-baam tymmen ki bei ki pa yong ki kiwa da heh rta, wa kiwi kiwi.
Kiwa yang wow yoh pali wow chondur toh kiwa na Mihmyntdu, Nongjngi, Mukhaialong wa kiwi kiwi kiwa da raikut wow yang bait myntu i miet wow yoh ki u chondur mynstep.
Chooh chooh hawa yaklam wa ki bru na Mukhaialong, East Jaiñtia Hils wa da em ka hukum na u DC ka District yong ki wa da chah u chondur hapoh ka District kam ha ki yung krehkaam BDO, da ong ki wa hanlada em i chondur hapoh East Jaiñtia da kwah ki wow wan chondur ha Jowai neibhah wa rap smat wei i chondur ha East Jaiñtia won dang boon wa yohchwa ya ki.
Kiwa boon da pynbaad ki wa ynnin ki wakreh ha kani ka bynta da phah chim pyrtuid chwa ki ha kiwa para yang (kiwa yohchwa) tangwa ynne da chah kyntait ki neidaw wa da em wa yohchwa ya ki.
Da kyntu ki leh ya ka sorkar wow chimkhia yeini i eh i khoo yong ki waroh heiyatoh wa i rukom wan chondur Aadhaar.
