Ka Khasi Students’ Union War Jaiñtia Circle da beiñ joor ko ya ki damok kiwa thombor ya ki VDP yong ka chnong Lakroh wei khreh ki wow pynmynsoo leh ya u waheh chnong wa Secretary chnong yong ka chnong Lakroh ha ka 05-08-20 ha i por 9 waje i miet.
Ka seiñ ha i yaklam wa u Secretary chnong da ong u wa ha katai ka tarik, ki bru kiwa tip pyrtuid kam u Sanjay Syndai wa u Ferby Syndai na ka chnong Muktapur, u Ency Shadap uwa man u President yong ka HANM East Jaiñtia Hills wa u Sambormi Lyngdoh uwa man u President yong ka EJNC deilang wa ki bru yong ki da lai psiah yabor ki hapoh ka chnong Lakroh kiwa da choh da dat ya ki VDP chnong deiwa maham leh ya u waheh chnong wa u Secretary chnong yong ka chnong Lakroh.
Ka seiñ hawa yatoh wa ini da dap ko dei sñiawsih hawa kam kiwa yahkhmat ki seiñbhalang burom ki ya kiwa yahkhmat chnong katwa kini won da maham wei tba kti ki khlem kiwon kiwon ki daw. Hei yong sakhiat lada em iwon iwon i bakla, toh wow pynbiat lane wow yaklam sñiawthooh wa ki paradoh parasnam wei ym toh wow wan leh khla deiwa maham deiwa pynkhor.
Ka seiñ hajrong ini i bynta da booh ko ya i maham ya kiwon kiwon ki bru chim kabu kiwa thmu wow yooh beiñ ya ki bor wa ka iktiar yong kiwa yahkhmat chnong hapoh War Jaiñtia, ka seiñ da klam che wa ym maap ko wei u e ko yei yada ya kiwa yahkhmat chnong la ha kiwon kiwon ki bynta.
Ka seiñ lyngba kani ka kyrwoh da maham joor ko ya ki bru kiwa na baar wa ym toh wow wan luchia ya i chongsuk chongsaiñ yong ka thaaiñ.
Ka seiñ da beiñ joor ko leh ya ki damok kiwa tooh wei lute ya u kwai yong u George Ros Mingson Manner uwa toh naka chnong Trangblang ha ka 19 tarik uni u bnai ha ka chnong Rymbai Sohpieng wei da chem wa i sakhiat wa toh kini ki jooh kiwa yahkhmat ya kini ki seiñbhalang kiwa leh ya ini i kaam.
Ka seiñ da kyntu ko ya ki bor yong ka aiñ wow kem noh smat ya kini ki damok wei wow pynkrehkaam katkam ki kyndon yong ka aiñ.
Ka kyrwoh na u General Secretary ka seiñ u Lurman B. Talang.