U SP ka West Garo Hills District da pyntip u wa ha ka 14 tarik u Wisu 2020 da yoh ya ka ujor ha ka Tura Women Police Station wa uwi u bru wa tip kam u Rasthy A. Sangma da slaitbor u ya kawi ka khynnah wa dang khian rta hei yung wa sah ko la chi snem.
Hadien wa pynman ya ka takit wa yahkhmat da ka SI Salmay R. Marak wei hadien wa pyndep ya ka takit ha ka 12-05-2020 iwa hapoh 60 sngi kamwa da booh kyndon da ka aiñ da rah yei kaam hakhmat ka yung bichaar ka Special Judge (POCSO), West Garo Hills, Tura heiwa haka 27-06-22 da pynmih ya ka rai pynrem deiwa phah kset ya u Rasty A. Sangma 20 snem deiwa khor bha deilang waka kuna kawa T. 25,000 wei lada ym su u ya kani daw hap u chah kset u sa 6 bnai.
Uni u bru toh uwa da em leh sa kawi ka mukotduma slaitbor sa ya kawi ka khynnah khian rta wei ya kani ka mukotduma dang chong bichaar nadooh ka 21-11-21.
Sa ha iwi won iwa da jia, ka Tura Women Police Station da yoh ujor ko ha ka 04-10-16 wa u Beatbeat Ch. Marak da slaitbor u ya kawi ka kynthai heipor wa lai rep ko wei da maham u ka leh lada khana ko ya kiwon kiwon.
Ya ini da takit da ka SI Renu D. Momin wei da sdang u chong bichaar ha ka 31-07-17. Hadien wa kut ka bichaar, da pynmih ya ka hukum rai pynrem ya u Beatbeat Ch. Marak ha ka 31-05-22 yow phah kset ya oo da 7 snem deiwa khor bha deilang waka kuna wa T. 10,000 hapoh ka kyndon Section 376(1) IPC. Hapoh ka kyndon Section 506 Part II IPC wa 323 IPC ka yung bichaar da phah kset ko sa 2 snem wa chi snem.
