Ynne ka sngi ka Jaiñtia National Council – Khliehriat Circle hapoh i yahkhmat u Working President, u Diamon Bareh da ujor ko ha u Deputy Commissioner ka East Jaiñtia hajrong i joor thut i pynkrehkaam ya ka Supplementary Nutrition Program (SNP) hapoh ka District.
Ka seiñ da pynsñiaw ko wa katkam ki hukum sorkar, ki khynnah kiwa hapoh 6 snem, ki kynthai wa pun-khon wa kiwa e yimbu khon em ki ka hok wow yoh baam wow pyndap neibynta 25 sngi ha ka chi bnai, wa kynthup ya ki baam wa da chet man-ka-sngi wa ki baam step neibynta ki khynnah kiwa dang 3–6 snem ha ki Anganwadi Centre.
Tangwa katkam ki ujor na kiwa boon ki chnong wa kynthup ya ka Khliehriat da ong wa ki baam wa yoh ki man ki du chisien chi bnai em hadooh chisien ha ki 2-3 bnai, wei ini ymtoh i bakla wa khian tangwa i dooh myntoi wa khroo.
Ka seiñ da ong ko leh wa ha i yaklam wa ka CDPO, da pynyoo wa i pynbiang wei pynpsiah poisa cha ka District man i du chisien ha ki ar næ le bnai iwa pynman ya ka wym ye u bood ya ki kyndon.
“Lada man ini iwa sakhiat, pynyoo i yei tlot i rukom krehkaam ha ka kyrdan yong ka jylla wa District wei i dooh nong toh toh ki khynnah wa ki manbei ka East Jaiñtia Hills,” da ong ka seiñ.
Ka JNC da dawa na u DC wow pynman yei takit hajrong i pynkrehkaam ya ka SNP ha East Jaiñtia Hills, wa kynthup ya i yukheiñ man-u-bnai ya ki mar baam wa da yoh na ka jylla wei rukom saam cha man ki Anganwadi Centre.
Ka seiñ da ong ko leh wa daw booddien bha ko ya ini i kaam.
Discussion about this post