Hadien wa dep pynman ya ka Overseas Nursing Job Fair ynnin u snem heiwa da em palat 1000 ngut ki Nurse kiwa da wan ki wow chimbynta wei na kini da em 27 ngut ki Nurse kiwa na Meghalaya kiwa da yoh kreh ha Japan hadien wa pyndep ki yei chah sikai yow klam Japanese wei da yoh kreh ki ha ki Hospital wa ki Homecare wa em ha Japan.
Hapoh ka “Skills Meghalaya” Scheme, ka sorkar Meghalaya da yarap poisa ko Rs. 50,000 kawi lyngba ka Meghalaya State Skill Development Society (MSSDS) wei ka thong toh yow yarap ya 300 ngut ki Nurse ha ki snem wow wan.
Heiyatoh wa ini, neiliang u Montri Rangbah, u Conrad K Sangma da lai u cha Japan yow yachem wa kini ki Nurse kiwa da yoh kreh kiwa da pynsñiaw yei kmen wa da poi cha ka thong hapyrdi chiboon i eh, kamtæ da pynchlur u leh ya kiwi wow wan chakhmat wow chim kabu ya kani ka laad wow kreh cha baar ri yow pynyaar yei stat yong ki.
Kini ki 27 ngut toh kiwa dadep Register waka NAVIS yow chah sikai klam Japanese wei wow pynsñiawthooh chaphang ka dustur riti iwa da pynman ha Bengaluru. Wei na kini da em 25 ngut kiwa Pass ya ka N4 wa N5 Exam hei sien nyngkong wa pyrchang ki wei da yoh ki leh yei kreh wei na kini da em 5 ngut kiwa da yoh Visa yow lai cha Japan wei ar ngut da dep ki wow mih yoh lai cha Japan ha ka 27 tarik u Naisan wei kiwa dang sah dang pynkhreh ya ka Visa yong ki.
Da em leh 14 ngut ki Nurse kiwa da yoh kreh ha kiwa boon ki thaw sumaar wa em ha Singapore wei kini daw lai kreh ki ha kini 3 bnai wow wan.
Yei e sikai da pynman da 10 ngut kiwa sikai kiwa na Japan wa em ha NAVIS, iwa da pynman leh yeini i kaam iwa jop hanla man iwa eh wow tip u klam yei ktien wa thymme.
Najrong ka NAVIS, da em leh sa le tylli ki seiñ ki wow kreh yow pynman yeini i pynyoh kreh wei da dep soi soskular ha ka 07-12-23 yow pynyoh kreh ha Japan, UK, Singapore wa ha UAE.
Ki ar ngut kiwa da yoh u sdang kreh toh ha Kobe Kaisei Hospital wa em ha sor Kobe ka ri Japan wei kini toh ka Iaikyrmen Khardewsaw wa ka Jenisha Lyngdoh.
Neiliang ka Laikyrmen kawa na chnong Umtrew, Ri-Bhoi District da ong ko deiwa wan nei chong wa khian hadooh u poi chadooh ka Japan da man ko ka luti kawa eh bha tangwa deiwa yarap u Blai uwa da emlang bait wa ka kamjooh kiwa ha-yung ha sem ko da yoh mynsien ko hadooh wa ye u poi thong.
Ka Jenisha Lyngdoh won toh kawa na Nongpoh, Ri-Bhoi wei da khana ko wa da tip ko chaphang ka NAVIS hadien wa lai chimbynta ko ha ka Job Fair wa da pynman ynnin u snem wei da lai ko cha Bengaluru yow tip u klam yei ktien Japanese wei nyngkong da ong ko wa man iwa eh bha tangwa katwa dang lai ki sngi da ye wow nang tip.
Kamtæ da e khublei ko ya u Montri Rangbah kamjooh ya ka sorkar kiwa da e laad ya ka wei da pynchlur ko leh ya kiwi wow chim ya kani ka kabu neibhah da em ka sorkar kawa e yei kyrchaan.
Discussion about this post