Ha Meghalaya ynne ka 19 tarik da em 110 ngut kiwa dang chait na u COVID-19 iwa da pynpoi ya waroh kiwa da chait cha ka 6,392 ngut katwa kiwa dang yoh da em ki 28 ngut kiwa da em waroh 2,069 ngut.
U Director of Health Services (MI), u Dr. Aman War da pyntip u wa na ki 28 ngut kiwa dang yoh, ha East Khasi Hills da em 11 ngut, ha West Jaintia Hills 6 ngut, ha Ri-Bhoi 5 ngut, West Garo Hills 5 ngut wa ha East Jaiñtia Hills 1.
Na kiwa dang yoh ha East Khasi Hills da em ki bru chipai-1, ki High Risk Contacts-7, Laban Cluster-1 wa 2 ngut kiwa dang liwan. Ha West Jaiñtia Hills toh 6 ngut ki High Risk Contacts, ha Ri-Bhoi ki bru chipai-1, ki High Risk Contact-3, deiwa leh Random Sampling ha Khanapara Cluster-1, ha West Garo Hills ki High Risk Contact-5 wa ha East Garo Hills-1 High Risk Contact.
U Dr. War da ong u leh waka chnat i chait i khiah daw pait ko ha kini ki sngi wow wan lada pteiñ u duna kiwa dang yoh.
U Director of Health Services da pyntip u leh wa na kiwa dang chait kiwa 110 ngut, ha East Khasi Hills da em ki 72 ngut, ha Ri-Bhoi 23, West Garo Hills 13, West Jaintia Hills 1 wa ha South West Garo Hills 1.
U Dr. War da pyntip u leh wa ki nongmuna kiwa da dep phah Test da em ki 1,88,256 tylli, na kini kiwa ym em chah ktah da em ki 1,79,720 tylli wei kiwa da psiah chapoh ka jylla da em ki 50,124 ngut.
