Ynne ka sngi neiliang u General Secretary ka United Democratic Party (UDP), u Dr. Jemino Mawthoh da ong u wa i chna ya ka sorkar Meghalaya Democratic Alliance (MDA) toh deiwa sñiawthooh lang ki seiñ wa boon heiwa u President warim ka UDP, u Dr. Donkupar Roy da pynwandur u ya kani ka sorkar ym toh kamwa kam u President ka BJP u Ernest Mawrie wa toh ka BJP wa wanrah yaka sorkar synrop.
Neiliang u Jemino da ong u wa nadooh wa sdang, yeiwa da klam hapoh kani ka dhab ka sorkar MDA toh wow yatylli wei wow pynlai bait ya ki kaam tangwa katni nawon ka BJP kawa em du ar ngut ki MLA wow kamtre ko wa toh ka kawa thung ya u montri rangbah, toh iwa bakla.
Da pynrap u leh wa ini i klam u Mawrie toh du neidaw wa em i yaphær yumut hapyrdi kiwa pynlai ya ka BJP wa ki MLA ya kiwa da jied da ki paidbah.
Chooh chooh da ong u wa ka MDA da em ko ya ka Co-ordination Committee khnang wa kiwa yahkhmat ki Party wa ki MLA u ye ki wow pynsñiaw yeiwa emkaam tangwa neidaw wym yohlaad u leh yeitæ wow yaklam da mih noh i sñiawyaphær heini heitai tangwa ym em mut wow pynpiah yaka yung.
