Ynne da sdang ya ki yalehbol ki kynthai ha ka U-17 ka 2nd North East Olympic Games 2022 kiwa da pynman ar tylli ha MFA, Third Ground, Polo.
Ka Manipur da jop suk ko da 6-0 ya ka Assam ha Group 1 da ki kool ka L Babina (11’, 29’, 72’) kawa da yoh ya ka Hat-Trick katwa ka Mizoram da jop ko ya ka Meghalaya da 4-2 ha ka Group 2.
Ka Meghalaya da yoh ko wow thap kool nyngkong lyngba ka Makrisha Songthiang (13’) tangwa ka Mizoram da su kylliang ko ar kool hapoh ar minit.
Ka C Lalremruati da thap ko chi kool ha ka minit wa 26 wei da ban sa chi kool ha ka minit wa 28 lyngba ka Sandra BN.
Ha ka kylla miet, ka Mizoram da thap ko sa ar kool lyngba ka Lalremruati (65’) waka Lalrinmawi (73’) yow pynkut ya ka yalehke da 4-1.
Mynstep daw pteiñ ki yalehke ka U-21 ki chynrang heiwa ka Arunachal Pradesh daw yachem ko waka Meghalaya heipor 9:00 waje i step ha ka Group 2. Ka Mizoram daw yachem ko waka Assam ha Group 1 heipor 12:30 i sngi wei daw pynbood da ka Sikkim pyrchah ya ka Nagaland ha ka Group 2 heipor 4:30 i sngi.
