Ka yalehke yong ka 2nd Sumer League 2022 wa pynlai daka Sumer Socio Cultural Sports & Education Development Society hapoh ka Sumer Elaka, East Jaiñtia Hills District da poi ko cha ka sngi wa ar deiwa emlang leh u Domanik Pala, u diah yong u MP, u Vincent Pala kam u kongsan wa ki kattu katni ngut ki waheh kiwa da synran lang wa oo.
Ha kani ka sngi da yoh yei klam na u Amnesty Salahe uwa man u Secretary yong ka SSCSEDS uwa da khana wa ka Society i thmu ko toh wow pynku yaki khon yong ka Elaka Sumer kam hei sap rwai, i chaad, i tem wa i yalehbol wa kiwi de.
Da yoh leh yei sneiñ na u Begin LS Paslein, uwa man kam u President yong ka SSCSEDS, u Poli Dkhar wa u Shibor Pyrngap.
Da yoh leh i sneiñ na u D. Pala uwa da ong toh u pynemkaam yei sap wa da e uwa booh wa thaw, wei da kyntu u leh ya kiwa yalehke wym toh u dooh kyrmen lada em hei rem wei ya kiwa jop leh ym toh u sñgiaw sarong, iwa emkaam toh u kreh chitom yoh u poi cha ka thong, da ong chooh chooh u wa oo man u wa maya bha yaka Sport khamtam ka Football wei neibynta ka bol da lai u leh cha baar ri yoh u pait yei sap ki bru hadooh wow lai pait leh ya ka FIFA World Cup.
Da e khublei kyrpang u leh ya kiwa kitkaam yong ka Society kiwa da tympiah yei jabieñ yong ki yow pynman ya kani ka lympung yalehbol kawa yaleh da ki seiñ kur wa em hapoh ka thaaiñ wei ym pu jooh sñiaw wa da em wa leh ya kam ini.
Ki yalehke wa da pynman ynne ka sngi toh hapyrdi ka Kur Paslein L&U FC pyrchah yaka Kur Chadap Manar FC heiw ka Kur Paslein da jop ko da 3-0 lyngba ki kool wa da thap da u Iohi Paslein.
Haka yaleh wa bood, ka Kur Paslein Combine FC da yachem ko waka Kur Dkhar FC heiwa ka Kur Dkhar FC da jop ko da 2-0 lyngba ki kool wa thap u Dos Dkhar.
