U Montri Rangbah ka Meghalaya, u Conrad K Sangma ynnin ka sngi da wai u ya ka SHG Mega Event cum Health Mela wa pynman da ka Umsning C&RD Block, Ri-Bhoi District ha Union Christian College, Umiam Khwan. Da emlang leh u Dr. WR Kharlukhi, MP, Rajya Sabha, u Dasakhiatbha Lamare, Minister, PWD (Buildings), u Jason Sawkmie Mawlong, MLA, Umsning, ka Macdalyne Sawkmie Mawlong, MDC, Umsning deilang waka RM Kurbah, Deputy Commissioner, Ri-Bhoi wa kiwi de ki heh ka District.
U Conrad hawa e yei klam da ban joor u yei emkaam ki Self Help Groups. Da ong u wa ka sorkar da sñiaw emkaam ko wow yada yei thied i tre yow ye u kynjoh cha waroh ki manyung mansem, deiwa ong leh wa ki SHG ym man ki du kam kiwa e khih e kreh tangwa kam ki chlem wa pynyabi pynyatipmit iwi ya kiwi. Da ong u leh wa i em ki SHG daw ye wow pynemkaam ya kiwa boon ki thong krehkaam ka sorkar.
U Montri Rangbah da ong u wa i sdang ya ki SHG da man ko kam u chabi wow pynjop ya iwa boon wa pynkrehkaam ka sorkar. Da pyntip u wa na 6,000 tylli da ku cha 36,000 tylli ki SHG hapoh ka jylla, kamjooh da ong u wa ki Village Organization da ku na 200 cha 2500 tylli. Chooh chooh da ong u wa i bhah wa da booh wow yarap poisa da ku ko na T. 10 klur cha T. 110 klur.
“Yeini i jop wa da yoo lyngba i seiñ ya ki SHG wa da em palat 3.5 lak ngut ki kynthai kiwa da yoh myntoi na ki Scheme sorkar wei ini toh iyi iyi wow pynkmen,” da dong u. Da pyntip u leh wa ka thong toh wow poi 42,000 tylli ki SHG ha sa chi snem.
“Ynne hapoh ka Umsning Block kamwa T. 1.6 klur daw pynlait cha ki 181 tylli ki SHG na ka NRLM wa hapoh Umling Block T. 78 lak daw saam cha ki 135 tylli ki SHG,” da khana u Conrad.
U Conrad da khana u leh chaphang ka FOCUS kawa e yarap poisa cha ki warep.
