theme-sticky-logo-alt
theme-logo-alt
Advertisement ad1

Da wai ya ka chlem e sikai Hindi ha Shillong

Advertisement ad1
Advertisement ad1

U Montri Rangbah ka jylla, u Conrad K Sangma deiwa emlang u Montri ka chnat puræ puthi ka sorkar India, u Dharmendra Pradhan ynne ka sngi da wai ki ya ka Kendriya Hindi Sansthan ha Mawdiangdiang, Shillong kawa man ka chlem e sikai ktien Hindi. Da emlang leh u Montri ka chnat puræ puthi ka jylla, u Lakhmen Rymbui.

Hawa e yei klam, u Conrad K Sangma da ong u wa ha kiwa boon ki jylla ym em chimkhia ki ya ka ktien Hindi. Da ong u wa ki khynroo khyllood da pyrchang ki wow puræ ya kiwi ki ktien kam i Japanese, Italian wa Spanish deiwa kyrmen wow yoh kreh ha kitai ki ri. “Lada i jooh chimkhia wow puræ ya ki ktien kiwa na baar ri wow puræ ya i ktien Hindi, daw yoh kabu bha ki bru,”. Da ong u leh wa lada ym ye wow pyndooh yei wym ya sñiawthooh hei yaklam, daw eh bha ya kiwa na thaaiñ mihsngi wow yoh kreh ki cha kiwi ki jylla ka ri khlem da tip wow klam Hindi.

Advertisement ad1

“Nga da dep lai puræ O ha Delhi wei da tip O wow klam Hindi wei katni kam u Montri Rangbah manda lai O cha Delhi manda yaklam O wa ki Montri wa ki heh sorkar da man ko kawa suk,” da ong u Conrad.  Da pynsñiaw u leh yei kmen hawa yoh ya kam kani ka thaw puræ hapoh ka jylla deiwa pynchlur ya ki khynroo khyllood wow chimkhia ya i ktein Hindi.

U Montri Rangbah da ong u wa katkam ka Education Policy wa thymme, da pynchlur leh wow pynemkaam ya ki ktien yong idæ ha ki skur wa ki College. “Ka North East toh kawa mahajon ha ki ktien ki thylliej, ka dustur riti wei emkaam wow pynneh pynsah yeini iwa man leh i rukom wa da tipmit ya ki jaitbru heiwa da em leh ki ktien kiwa da dep dooh jait,”.

Chooh chooh da ong u wa emkaam wow pynemkaam yei stat i juk wa katni yow pynneh pynsha yei yong u warim deiwa pynlang pynlum ya ki kot ki sla. Da kyntu u leh ya u Montri wow thooh bniah ya ki jait ktein wa em ha Meghalaya.

Da ong u leh wa ka Meghalaya daw lehkmen ko yei dap 50 snem ha ka 21 u Duyatra 2022 wei daw man ko iwa yahaap bha lada yei ktien Garo wa Khasi u kynthup lang ki hapoh ka 8th Schedule. “Ki bru ka jylla da kreh chitom ki wow kynthup lang ya kini ki ktien hapoh ka 8th Schedule wei ka Meghalaya Assembly leh da chim ko dei rai yow tipmit noh ya kini ki ktien, wei lada jia ini daw man ko kamwa kyrkhu ya ki bru ka jylla.”

Neiliang u Montri ka chnat puræ puthi ka sorkar pyrdi, u Dharmendra Pradhan da ong u wa ka Kendriya Hindi Sansthan, Shillong daw yarap ko ya kiwa lai puræ puthi kiwa na ka jylla Tripura, Mizoram wa Meghalaya. Da ong wa ya i ktien wa klam ym ye wow pynbor ha kiwon kiwon tangwa u tip u klam ya kiwi ki ktien daw man ko i kyrkhu. “Ka India toh kawa mahajon ha waroh ki liang nadooh ki yong u warim wajah wei waroh ki ktien hapoh ka ri toh u man ki kam i ktien yong nga wow tip u klam.” Da ong u leh wa i stat wa katni ye wow pynku wei wow pynneh pynsah yei mahajon ha ka dustur riti ym du hapoh pyrthai, kamjooh leh hapoh ka ri waroh kawi.

Da ong u leh wa ka North East man ko kam i yung wa em boon ki dustur riti, ki myllien wa bha wa i stat i tip wa ye wow saam lang cha kiwi ki bynta ka ri.

Neiliang u Montri ka chnat puræ puthi ka jylla, u Lakhmen Rymbui da ong u wa i ktien toh iwa emkaam wei ka India toh kawa da kyrkhu da kiwa boon ki ktien khamtam ha thaaiñ North East. Da ong u leh wa kani ka chlem e sikai daw yarap ko ya ka thaaiñ wow tip wei wow sñiawthooh yei ktien Hindi deiwa rap bha. Da ong u leh wa i Hindi ye wow pynemkaam hawa yaklam deilang wei ktien English wei da pyntip u wa ka sorkar da sikai ko ya kiwa sikai skur wow sikai ya ki khynnah wow tip u klam kattu katni iwa emkaam u tip hei ktien Hindi.

U Montri Rangbah deilang wa kiwi kiwa emlang da pynlait ki ya ki kot ki sla. 

Share this:
Previous

Dooh ki ar ngut ki khynnah yei mynsien hadien wa baam i diñ ya i yung ha Ummulong

Next

3.5 lak ngut ki kynthai wa da yoh myntoi lyngba ki SHG