December 30, 2022
Da: U C. Pynsakhiat Yeini Kyndiah
Napoh u Trop Ksiar Trop Rupa ka Bei wasa,
Yei man Khlawait dadep phrang chwa.
Wow phah cha pyrthai wow yieñ yaleh,
Cha jngai yow wa choon u beh.
Man ka 30 tarik Kmaichonglad wa kynmoo,
Ya ki kha-kti wa dadep rooid ha’u moo.
Hajar ki r’ta wym plæh de ki,
Yeiwa da chah stieh neibynta ka Ri.
Hun mi u pynchah dei yong me i rynyieñ,
Dei suk ya ka pateiñ u pynkieñ.
Yei khia i chon wakit wabah,
Neh i naam mi Woh Kiang Nangbah.
Nadooh u snem 1862 hadooh u 2022,
Ki snem wa daphet dalai la 160 tylli.
Laitlooid da yoh wow synchaar pyn da i hi,
Katni chongbroo won i pyn hapoh ka Ri.
Katni kiwa kbai wa kyrha da khlot waki ch’koor,
Wa nga toh u Khlawait kylleiñ da poor.
Manda yoh yeiwa mut wa thmu yong ki,
Kitai de ha kdong wa chong kli kti.
Ham smai ham kynmoo de yei pyrtuid Khlawait,
Katwa i kaam wei leh mar cha wa ngait.
Man-u-snem yow Khlawait wymye u kha,
Ham pynlet wow ong u Khlawait toh nga.
Ngooh yow Blai lada i por wow dawa,
Sa chisien to phah yow Khlawait wa paka.
Kamwa u Kiang dadep leh hei r’ta yong oo,
Iyi cha i kaamram nga u pateiñ u pynyoo.
