Kamwa 32 tylli ki lieñsuiñ kiwa pynlai da ki Airlines ka ri India da chah pyntieñ ki wa em Bomb ha ki du ynnin ka sngi iwa da pynbor ya ki Airport wow pynjoor yei sylli ya kiwa lai wa wan.
Na kini, kawi ka lieñsuiñ da hap hiar syndet ko namo ka Emergency Landing wei wow sylli ya ka katwa kiwi tawon won da sylli ya ki manda poi thaw ki wei ini da pynslem i yei lai i wan ki paidbah.
Ka Vistara Flight UK17, na Delhi cha London da hap pynkylla luti ya ka chawi (Diverted) ha Frankfurt, Germany heiwa da sylli ya ka chwa wow lai won ko cha London iwa chimpor kamwa 2 kynta wow sylli.
Ki Airlines wa pynlai lieñsuiñ na India kam ka Air India, IndiGo, Akasa Air, Vistara, SpiceJet, Star Air wa Alliance Air da chah pyntieñ em Bomb ki deiwa thoh Message ha paikhana (Lavatory) katwa kiwi won da phah lyngba ki Social Media wa email wei hadien won da chem wa toh iwa thok.
Hajrong ini waroh, ka Bureau of Civil Aviation Security (BCAS) da chong yalang ko wa ki CEO wa kiwa mihkhmat ki Airlines ha New Delhi ynnin ka sngi.
Neiliang u Director General ka BCAS, u Zulfiquar Hasan da ong u wa ka yalang ynnin da man ko kawa lai bait wei i lai i wan ki lieñsuiñ ha India hi man kiwa chngaaiñ deiwa kyntu ya ki paidbah wymtoh u man ki kiwa tieñ.
Heijooh i por ka Civil Aviation Ministry da pyrkhat ko wow chimkhia bha yeini deiwa khang ya kiwa emkti u lai ki lyngba ki lieñsuiñ deiwa booh ki ha ka No-Fly List.
Kam wow kdaw heini ki pulit da kem ki ya uwa 17 snem na Chhattisgarh heiwa manda takit ya oo da phla u wa pyntieñ u hadooh 19 sieñ dei chrai ya u para wa kreh yong oo heiyatoh wa i kaam poisa.
Discussion about this post